Italiya chempionati 32-turidagi “Latsio” — “Roma” bahsida durang qayd etildi. Uchrashuvda Alessio Romanyoli hisobni ochgan bo‘lsa, birozdan keyin Matias Sule tablodagi hisobni tenglashtirib qo‘ydi.
Sofascore talqiniga ko‘ra, “Roma” posboni Mile Svilar uchrashuvning eng yaxshi futbolchisi bo‘ldi — 8,5 ball. Darvozabon bahsda 7 ta seyvni amalga oshirib, jamoasining 1 ochko qo‘lga kiritishida muhim rol o‘ynadi.
Zaxiradan maydonga tushgan Eldor Shomurodov 6,7 ballga loyiq ko‘rildi. 31 daqiqa harakat qilgan futbolchi bu vaqt davomida umumiy 11 marta to‘pga tegindi. U 5 marta jamoadoshlariga pas berdi hamda ularning 4 tasi aniq manzilga yetib bordi. Shuningdek, Eldor 5 marta to‘p uchun kurash olib borib, ularning 2 martasida raqibdan ustun keldi.
Shomurodovning hujum chizig‘idagi asosiy raqobatdoshi Artyom Dovbikning harakatlari 6,5 ball bilan baholandi va Tommaso Baldzani bilan birgalikda “bo‘rilar” safidagi eng yomon harakat qilgan futbolchi bo‘ldi.
“Latsio” tarkibidan eng yaxshi harakat qilgan futbolchi Luka Pellegrini bo‘ldi. U jamoasining yagona goliga hammualliflik qildi hamda bir nechta xavfli vaziyatlar yaratishda faollik ko‘rsatdi.
Izoh (0)