Italiya A Seriyasida mavsum yakunlandi. O‘zbekistonlik futbolchi Eldor Shomurodov harakat qiladigan “Roma” musobaqa turnir jadvalida 5-o‘rinni egalladi.
Shomurodov joriy mavsumda “Roma” safida ancha faol o‘yin ko‘rsatdi. U barcha musobaqalar doirasida jami 37 uchrashuvda maydonga tushib, 7 ta gol va 5 ta assist muallifiga aylandi. Agar Eldor 38-tur doirasidagi “Torino”ga qarshi bahsda ham gol urganida, o‘zining Italiyadagi shaxsiy rekordini takrorlagan bo‘lardi.
O‘zbekistonlik hujumchi A Seriyadagi ilk mavsumida 8 ta gol va 1 ta assistga mualliflik qilgan va bu Shomurodov uchun Apenin yarim orolidagi eng yaxshi mavsum hisoblanadi. Shundan keyin hujumchi “Roma”, “Spetsiya” va “Kalyari” kabi jamoalar safida o‘ynadi, biroq “Jenoa”dagi kabi samarali harakat qilmagan.
Ammo u yakunlangan mavsum gol+pas tizimi bo‘yicha yaxshi natija ko‘rsatdi — 12 ball. Futbolchi avvalgi yillarda bunday ko‘rsatkich qayd etmagandi.
Ma’lumot uchun, hujumchi 2020-yil yilning yozida “Rostov”dan “Jenoa”ga o‘tgan edi. Keyingi mavsum Genuya klubi Shomurodovni “Roma”ga transfer qildi. O‘zbekistonlik futbolchi rimliklar safida o‘z o‘yinini topa olmadi va bir necha mavsum davomida Italiyaning turli klublarida ijara asosida harakat qildi. Ammo o‘tgan mavsum avvalida Eldor “Roma”ga qaytgan edi.
Izoh (0)