A Seriyaning 31-turidagi “Yuventus”ga qarshi kechgan bahsda Shomurodov “Roma”ni mag‘lubiyatdan qutqarib qolgan golga mualliflik qildi (1:1). Shu bois o‘zbekistonlik futbolchi “Latsio”ga qarshi bahsda asosiy tarkibda maydonga tushishi kutilmoqda. Bu haqda Il Messaggero nashri xabar bermoqda.
Yil boshida “Roma”ni tark etishga yaqin turgan Eldor Shomurodov jamoadagi mavqeyini mustahkamlashda davom etmoqda. “Yuventus” darvozasiga kiritilgan gol uning o‘ziga bo‘lgan ishonchini yana bir bor oshirdi. O‘zbek hujumchisi so‘nggi paytlarda zaxiradan maydonga tushib, muhim bahslarda foydali o‘yin ko‘rsatmoqda, deb xabar beriladi manbada.
Rim derbisi arafasida tajribali mutaxassis Klaudio Ranyeri tarkibda o‘zgarishlar qilishi kutilmoqda. Roma Press nashri xabariga ko‘ra, Shomurodov va Dovbik hujum chizig‘ida birga harakat qilishi mumkin. Shuningdek, Salemakers ham asosiy tarkibdan joy olishi aytilmoqda.
Shomurodov uchun bu bahs o‘zini isbotlash, Rimdagi obro‘sini oshirish va asosiy hujumchiga aylanish uchun navbatdagi imkoniyat bo‘lishi mumkin, deyiladi Roma Press bergan xabarda.
Avvalroq Eldor Shomurodov “Roma” bilan shartnomasini 2027-yilga qadar uzaytirishi haqida xabarlar tarqalgan edi.
Ma’lumot uchun, “Latsio” — “Roma” o‘rtasidagi bahs 13-aprel kuni Toshkent vaqti bilan 23:45 da boshlanadi.
Joriy mavsum Eldor “Roma” safida barcha musobaqalarda 30 ta o‘yinda maydonga tushib, o‘z hisobiga 6 ta gol va 3 ta golli uzatmani yozdirib qo‘ygan.
Izoh (0)