Шимолий Корея етакчиси Ким Чен Ин мамлакатнинг ядровий қуролларини тезкор равишда кенгайтириши кераклиги борасида топшириқ берди. Бу ҳақда Reuters агентлиги хабар берди.
Қайд этилишича, Ким Чен Ин АҚШ ва Жанубий Кореянинг биргаликдаги ҳарбий машғулотларини уруш қўзғатиш истагининг яққол ифодаси деб атаган.
Жанубий Корея ва АҚШ яқин кунларда биргаликда ҳарбий машғулотларни бошлайди. Улар Шимолнинг ядровий таҳдидларига қарши жавоб чораларини ҳам синовдан ўтказишади. Пхеньян бундай машғулотларни мунтазам равишда танқид қилиб келади. Сеул ва Вашингтон эса машғулотлар мудофаа учун эканлигини таъкидлайди.
Нашрнинг аниқлик киритишича, 40 та дала машғулотининг 20 таси сентябрь ойига кўчирилган. Машғулотларнинг кечиктирилиши Жанубий Корея президенти Ли Жаэ Мюнгнинг Шимолий Корея билан кескинликни юмшатиш истаги билан изоҳланган. Бироқ таҳлилчилар Пхеньяннинг бундай ташаббусга ижобий муносабат билдиришидан шубҳаланмоқда.
“Машғулотлар Шимолий Кореяга нисбатан душманона ва қарама-қарши муносабатни сақлаб қолиш ниятининг яққол ифодаси”, — дея Кимнинг сўзларини келтирган Шимолий Кореянинг KCNA нашри.
Шимолликлар раҳбарининг иддаосича, хавфсизлик борасидаги вазият Шимолий Кореяни ядровий қуролларни тезкор равишда кенгайтиришга мажбур қилмоқда. Шунингдек, у АҚШ ва Жанубий Корея машғулотларида ядро элементи бўлганини қайд этган.
АҚШ президенти Дональд Трамп ва Жанубий Корея етакчиси Ли Жаэ Мюнг ўртасида Шимолий Кореянинг ядровий салоҳиятини жиловлаш борасидаги навбатдаги учрашув Вашингтонда бўлиб ўтади.
Жанубий кореялик таҳлилчиларнинг айтишича, шимолликлар бу қадам орқали ядро қуролидан воз кечиш ғоясини бутунлай рад этмоқда ва келгусида қуролларни жиловлаб бўлмас даражага олиб чиқмоқчи.
Америкалик олимлар федерацияси 2024 йили эълон қилган ҳисоботида, Шимолий Кореяда 90 тагача ядровий каллак ишлаб чиқиш учун етарли даражада хом ашё бор. Бироқ амалда уларнинг сони 50 тага яқин.
Изоҳ (0)