Rossiyaning Sankt-Peterburg shahrida og‘ir hayotiy vaziyatda qolgan 100 dan ortiq O‘zbekiston fuqarolari olib kelinadi, deb xabar berdi “Dunyo” axborot agentligi.
Qayd etilishicha, mazkur insonparvarlik ko‘magi O‘zbekistonda 30-iyuldan 30-avgustgacha e’lon qilingan “Vatanga qaytarish” loyihasi doirasida mamlakat Bosh konsulxonasi va Migratsiya agentligi vakolatxonasi ko‘magida amalga oshiriladi.
Aksiyasi doirasida Sankt-Peterburg shahrida og‘ir hayotiy vaziyatda bo‘lgan 100 dan ortiq O‘zbekiston fuqarolariga vatanga qaytish sertifikatlari va aviachiptalar taqdim etildi. Ular 18-avgust kuni O‘zbekistonga kuzatib qo‘yiladi.
Bundan tashqari, 33 nafar o‘zbekistonlikka, shu jumladan, Xorijiy fuqarolarni vaqtincha saqlash markazida bo‘lgan va og‘ir moddiy ahvolda qolgan fuqarolarga moddiy yordam ko‘rsatildi.
“Vatanga qaytarish” xayriya gumanitar aksiyasi rejasiga asosan, avvalo Turkiya, Rossiya, Qozog‘iston, BAA, Saudiya Arabistoni, Hindiston, AQSH va Koreyadagi deportatsiya markazlarida bo‘lib turgan ayollar va bolalar vatanga qaytariladi. Xorijda og‘ir moliyaviy ahvolda qolgan fuqarolar Konsullik muassasalari yoki Migratsiya agentligi vakolatxonalari xulosasi asosida O‘zbekistonga olib kelinadi.
Vatanga qaytarilgan fuqarolarni samarali reintegratsiya qilish bo‘yicha amaliy choralar ko‘riladi. Ular davlat tomonidan taqdim etilayotgan maqsadli subsidiyalar, imtiyozli kreditlar, tadbirkorlik va o‘zini o‘zi band qilish dasturlari orqali qo‘llab-quvvatlanadi.
Mahalliy hokimliklar, Bandlik vazirligi, Oila va xotin-qizlar qo‘mitalari, vatanga qaytarilgan fuqarolarni ruhiy, ijtimoiy va iqtisodiy moslashtirish ishlarini amalga oshiradi.
Izoh (0)