Buxoro viloyati Ekologiya boshqarmasining 7 nafar inspektori tabiatni muhofaza qilish borasidagi jasorati uchun “Tabiat himoyachisi” ko‘krak nishoni bilan taqdirlandi, deb xabar bermoqda Ekologiya, atrof-muhitni muhofaza qilish va iqlim o‘zgarishi vazirligi matbuot xizmati.
15-iyul kuni Buxoro viloyati Ekologiya boshqarmasi inspektorlari tomonidan Peshku tumanining “Safron” cho‘l massivida reyd tadbiri o‘tkazilgan. Reyd davomida inspektorlar saksovulfurushlarning jiddiy qarshiligiga duch kelgan, qonunbuzarlar inspektorlarga tan jarohati ham yetkazgandi.
Ular, shuningdek, turli sovuq qurollar (bita, armatura, temir truba) bilan boshqarmaning avtomashinasini urib pachoq qilgan hamda inspeksiya boshlig‘ini har xil nojo‘ya so‘zlar bilan haqoratlagandi.
“Ammo inspektorlar o‘z jonini xatarga qo’yib bo‘lsada ortga chekinmaydi va huquqbuzarlikka chek qo‘yilib, qat’iy chora ko‘riladi”, deyiladi vazirlik xabarida.
Buxoro viloyati Ekologiya boshqarmasida 2-avgust kuni ushbu reydda qatnashgan 7 nafar inspektor “Tabiat himoyachisi” ko‘krak nishoni bilan taqdirlandi. Ekologiya vazirligi ushbu inspektorlarga o‘z kasbiga sadoqat, jasorat va mas’uliyati uchun minnatdorlik bildirdi.
Buxoroda 2024-yilning birgina sentyabr—oktyabr oylari davomida saksovul bilan bog‘liq 25 ta huquqbuzarlik aniqlangandi. Tabiatga 29 million 702 ming 400 so‘m zarar yetkazilgani hisoblangan va 222 million 900 ming so‘m jarima tayinlangan. Huquqbuzarlar jami 252 million 602 ming 400 so‘m tovon to‘lashi belgilangan.
Izoh (0)