Jizzax viloyatining Zafarobod tumanida Rossiya Federatsiyasi armiyasiga yollanib, ushbu davlatning Ukrainaga qarshi urushida qatnashgan O‘zbekiston fuqarosi ishi ko‘rib chiqildi. “Daryo” shu haqdagi sud hujjati bilan tanishdi.
Sud hujjatlaridan anglashilishicha, 2024-yilning oktyabr oyida Jizzax tumanida tug‘ilgan 24 yoshli Qodir Tolipov (ism-familiyalar o‘zgartirilgan) ishlash maqsadida Rossiyaga ketgan. Xorijga chiqqan fuqaro tayinli ishi yo‘qligi sabab Telegram messenjeri orqali ish beruvchilar eʼloni bilan tanishgan.
Telegram messenjeridagi “Rostov rabota” nomli kanaldagi eʼlon bilan tanishgan Qodir ularning taklifiga ko‘ra, 29-oktyabr kuni Rossiyaning Rostov oblasti, Rostov-na-Donu shahriga yetib borgan. Va Rossiyaning shu hududida joylashgan Qurolli kuchlari safida xizmat qiluvchilarni qabul qilish manziliga borgan. U nizolashayotgan davlatning fuqarosi yoki harbiy xizmatchisi hisoblanmasa-da, o‘zining moddiy va boshqa manfaatlarini ko‘zlab Rossiya Federatsiyasi Qurolli kuchlari safida bir yil xizmat qilish bo‘yicha shartnoma imzolagan, deyiladi sud hujjatlarida.
Aniqlanishicha, O‘zbekiston fuqarosi 2024-yilning 30-oktyabr kuni Novocherkassk shahridagi Rossiya Federatsiyasi Mudofaa vazirligiga qarashli harbiy qismga borib, harbiy jangovar tayyorgarlikdan o‘tgan. Shundan so‘ng “Axmad sila” harbiy polki, “Vagner” harbiy kompaniyasi tarkibida Ukraina qurolli kuchlariga qarshi harbiy harakatlarda qatnashgan.
24 yoshli o‘zbekistonlik 2025-yilning 20-yanvariga qadar harbiy harakatlarda qatnashib, sog‘lig‘idagi muammolar sabab bir muddat davolangan. 25-yanvar kuni esa O‘zbekistonning Rossiyadagi elchixonasi yordamida O‘zbekistonga qaytib kelgan.
2025-yil 30-iyul kuni Jinoyat ishlari bo‘yicha Zafarobod tuman sudida sudya Salohiddinov raisligidagi sud majlisida Qodir Tolipov Jinoyat kodeksining 154-moddasi 1-qismi (yollanish, yaʼni nizolashayotgan davlatning fuqarosi yoki harbiy xizmatchisi hisoblanmagan yoxud nazorat qilinib turgan nizolashayotgan davlat hududida doimiy yashamaydigan yoki hech qanday davlat tomonidan qurolli kuchlar tarkibida rasmiy topshiriqni bajarish vakolati berilmagan shaxsning moddiy manfaatdorlik yoki boshqa biron shaxsiy manfaatni ko‘zlab, o‘zga davlat hududida yoki uning tarafini olib qurolli to‘qnashuvda yoxud harbiy harakatlarda qatnashish uchun yollanish) bilan aybli deb topilgan. Unga nisbatan 4-yil muddatga ozodlikni cheklash jazosi qo‘llangan.
Izoh (0)