Davlat xavfsizlik xizmati Rossiyadagi o‘zbekistonliklarni A.U.Y. deb ataluvchi jinoiy harakatdan ogoh bo‘lishga chaqirdi.
Ma’lum qilinishicha, so‘nggi yillarda yoshlar orasida turli jinoiy guruh va submadaniyatlarning ta’siri keskin oshmoqda. Shulardan biri – A.U.Y. deb ataluvchi jinoiy harakat bo‘lib, u nafaqat o‘smirlarni, balki chet elga, ayniqsa Rossiyaga borib ishlayotgan fuqarolarimizni ham o‘z domiga tortayotgani bilan jiddiy xavotir uyg‘otmoqda.
“A.U.Y. yoshlar va mehnat muhojirlari hayotini vayron qiluvchi xavfli tuzilma. Nafaqat ota-onalar, balki mehnat muhojirlarini ham ogohlikka, hayoti va erkinligiga befarq bo‘lmaslikka chaqiramiz”, deyiladi DXX xabarida.
A.U.Y. o‘zi nima va u qayerda shakllangan?
A.U.Y. (“Arestantskiy uklad yedin” — “Mahbuslar qoidasi yagona”) — Rossiyada paydo bo‘lgan bo‘lib, u yerda jinoyatchilikning alohida shakli sifatida e’tirof etilgan xavfli harakatdir. U “o‘g‘rilar qonunlari”ni ideallashtirib, qamoqxona madaniyatini oddiy hayotga singdirishni maqsad qilgan. Rossiyada bu harakat 2020-yilda rasman ekstremistik tashkilot sifatida taqiqlangan, uning faoliyati uchun jinoiy javobgarlik belgilangan.
O‘zbekiston fuqarolari nima uchun ogoh bo‘lishi kerak?
DXX xabarida aytilishicha, bu tuzilma ta’siri Rossiyada vaqtinchalik ishlab yurgan ayrim O‘zbekiston fuqarolariga ham yetib bormoqda. Ommaviy axborot vositalarida va rasmiy manbalarda qayd etilishicha, so‘nggi yillarda bir nechta o‘zbekistonliklar A.U.Y. harakatini qo‘llab-quvvatlagani yoki unda ishtirok etgani uchun Rossiya qonunchiligiga asosan jinoiy javobgarlikka tortilgan.
“Bu holat nafaqat ularning erkinligiga, balki O‘zbekiston fuqarolari imidjiga ham salbiy ta’sir ko‘rsatmoqda”, deyiladi xabarda.
A.U.Y. qanday targ‘ib qilinadi?
Guruh a’zolari asosan internet orqali — ijtimoiy tarmoqlar, chatlar va videoplatformalarda o‘z saflariga odam jalb qiladi. Shuningdek, ular mehnat muhojirlari orasida ham “bratva”, “obshak”, “zakon po ponyatiyam” kabi iboralar orqali ta’sir o‘tkazishga harakat qiladi.
Bu harakatiga aloqadorlik qanday oqibatlarga olib kelishi mumkin?
Rossiya qonunchiligiga muvofiq, A.U.Y. harakatlariga aloqadorlik uchun 300 ming rubldan 600 ming rublgacha jarima, yoki 1 yilgacha ozodlikdan mahrum qilish, 1 yildan 4 yilgacha majburiy mehnat (axloq tuzatish) ishlariga jalb etish, yoxud 2 yildan 6 yilgacha ozodlikdan mahrum qilish bilan jazolanishi mumkin. Ishsizlik, deportatsiya, insonning huquqiy maqomi, erkin harakat qilish va oila kelajagini xavf ostiga qo‘yadi.
Ota-onalar va fuqarolarga murojaat. Farzandlaringiz kimlar bilan gaplashmoqda? Rossiyada mehnat qilayotgan tanishlaringiz, qarindoshlaringiz atrofida kimlar bor? “Zakon po ponyatiyam”, “obshak”, “smotryashiy” kabi atamalarni eshitdingizmi? Bu kabi belgilarni jiddiy qabul qiling. Har bir kechiktirilgan so‘z — ertaga fojiaga aylanishi mumkin, deya ogohlikka chaqirdi DXX.
DXX A.U.Y. bu faqat Rossiyada emas, balki xorijda mehnat qilib yurgan o‘zbekistonliklar uchun ham real tahdid ekanini yana bir bor bildirib, fuqarolarni bu tuzilmadan ogoh bo‘lishga undadi.
Izoh (0)