Буюк Британияда Ҳиндистонда юз берган Air India авиакомпанияси самолёти ҳалокатида яқинларини йўқотган икки оила бошқа одамларнинг жасадларини олганини айтмоқда. Бу ҳақда India Today нашри хабар бермоқда.
Маълум қилинишича, бир оила Лондондаги суд-тиббиёт эксперти ДНКни таққослаб, тобутда уларнинг қариндоши йўқлигини айтгандан сўнг, хатони аниқлаган. Оқибатда дафн маросимини зудлик билан бекор қилишга мажбур бўлишган.
Бошқа бир оилада вазият янада даҳшатлироқ - тобутда бир вақтнинг ўзида икки йўловчининг қолдиқлари борлиги аниқланган. Фақат такрорий экспертизадан кейингина уларни бир-биридан ажратиб, видолашиш маросимини ўтказилган.
“Айрим ҳалокат қурбонларининг қолдиқлари аралаштириб юборилган ва Буюк Британияга жўнатилган. Бир оилага бир вақтнинг ўзида икки кишининг қолдиқлари солинган тобут берилди. Натижада дафн қилишдан олдин уларни аниқлаш ва ажратиш керак бўлди.
Бошқа бир оила янада оғирроқ вазиятга тушиб қолди. Юборилган тобутда бошқа одам бўлган, уларнинг яқинлари эса ҳалигача топилмаган”, дейди адвокат Жеймс Хили-Пратт.
Унинг айтишича, жасадлар шунчалик куйганки, қариндошларидан ДНК топшириш сўралган. Шундан сўнг Аҳмадобод касалхонасида жасадлар герметик тобутларга жойлаштирилган ва оила аъзоларига топширилган. Қайд этилишича, Air India шахсни аниқлашда иштирок этмаган, фақат ташишни ташкил этишда кўмаклашган.
“Фожиа содир бўлганидан сўнг, жабрланганларнинг шахсини аниқлаш белгиланган протоколлар ва техник талабларга мувофиқ амалга оширилди. Барча қолдиқлар юқори профессионаллик ва марҳумларга ҳурмат билан топширилди. Вазиятни ойдинлаштириш учун Британия расмийлари билан ҳамкорликни давом эттирмоқдамиз”, дея маълум қилди расмий тузилмалар.
Буюк британияликлардан бири ота-онаси ва куёвидан айрилган. Унинг айтишича, уларга шунчаки ёрлиқли тобутлар берилган ва ичида ким борлигини текшириш имконияти берилмаган.
ОАВ маълумотларига кўра, ҳалок бўлган 12 кишининг жасади Буюк Британияга юборилган. Қолганлари оилавий анъаналарга кўра Ҳиндистонда дафн этилган.
“Баъзи қурбонлар зудлик билан ёқиб юборилди ёки диний анъаналарга кўра Ҳиндистонда дафн қилинди. Аммо камида 12 кишининг қолдиқлари Буюк Британияга жўнатилди”, дейди авиация ҳуқуқшуноси Жеймс Хили-Пратт.
Ҳиндистондан Буюк Британияга йўл олган Boeing 787 Dreamliner йўловчи самолёти 12 июнь куни Аҳмадобод шаҳри яқинида учиб кўтарилганидан бир неча дақиқа ўтиб ҳалокатга учраган. Лайнер шифокорлар ётоқхонасига қулаб тушган. Парвозни амалга оширган Air India авиакомпанияси маълумотларига кўра, самолёт бортида 242 киши бўлган.
Фақат битта йўловчи омон қолган. Кейинчалик эркакнинг айтишича, самолёт ҳавога кўтарилганидан сўнг “гўё ҳавода тўхтаб қолгандек бўлган”, сўнгра тиббиёт коллежи ётоқхонасига қулаб тушган. Сўнгги маълумотларга кўра, қутқарувчилар томонидан топилган авиаҳалокат қурбонларининг умумий сони 275 кишини ташкил этди.
Изоҳ (0)