2026-yildan boshlab AQSHda barcha toifadagi noimmigratsion vizalar, jumladan, sayyohlik (B-1/B-2), talabalar (F/M), ish (H-1B) va almashinuv dasturlari (J) vizalari uchun kamida 250 dollar miqdorida qo‘shimcha viza yig‘imi joriy etish rejalashtirilmoqda.
Yangi to‘lov 2025-yil 4-iyulda imzolangan One Big Beautiful Bill Act qonunida belgilangan. Unga ko‘ra, summa AQSH Ichki xavfsizlik vazirligi qaroriga binoan oshirilishi mumkin va har yili inflyatsiyani hisobga olgan holda qayta ko‘rib chiqiladi.
Hozirda mamlakatda 185 dollar miqdoridagi viza boji amal qilmoqda. Shunday qilib, majburiy yig‘imlarning umumiy miqdori har bir kishi uchun kamida 435 dollarni tashkil etadi. Ariza beruvchining yoshi, safar maqsadi yoki boshqa holatlarga qarab istisnolar nazarda tutilmagan.
To‘langan summa bir qator shartlar bajarilganda, jumladan viza rejimiga rioya qilish, noqonuniy mehnat faoliyati bilan shug‘ullanmaslik, mamlakatni o‘z vaqtida tark etish (viza muddati tugaganidan keyin besh kundan kechiktirmay), shuningdek, AQSHda bo‘lish maqomi o‘zgarganda yoki uzaytirilganda qaytarilishi mumkin. Biroq qaytarish tartibi hali rasman belgilanmagan.
Bundan tashqari, boshqa migratsiya va viza tartib-qoidalari, jumladan, kirish uchun ruxsatnoma (ESTA) olish, vaqtinchalik himoyaga ariza berish, qochqin maqomini olish va ularni uzaytirish uchun to‘lovlar ham joriy etilmoqda.
Mutaxassislarning hisob-kitoblariga ko‘ra, sayyohlik vizasini olishning umumiy qiymati 450-470 dollargacha ko‘tarilishi mumkin, bu hozirgi qiymatdan 2,5 baravar ko‘pdir. Yangi to‘lovdan tashqari, boshqa tegishli to‘lovlar, jumladan, I-94 shakli uchun to‘lov (24 dollar) va ESTA narxi (21 dollar o‘rniga 40 dollar) ham oshirilmoqda.
Ish vizalaridan faol foydalanayotgan Amerika IT-kompaniyalari allaqachon tashvish bildirmoqda. Ularning fikricha, to‘lovlarning oshishi mutaxassislarni yollash xarajatlarini ko‘paytiradi va iste’dodli kadrlarni jalb qilishni qiyinlashtiradi.
Izoh (0)