Жанубий Африканинг йирик мухолифат “Умконто ве сизве” партияси Миллий ассамблеяга (парламентнинг қуйи палатаси) мамлакатнинг амалдаги президенти Сирил Рамапосага полиция ишлари вазирлигидаги вазият муносабати билан ишончсизлик вотуми ҳақидаги қарор лойиҳасини тақдим этди. Бу ҳақда партия парламент фракцияси раҳбари Коллин Макхубеле маълум қилди.
“Партиямиз президентга унинг хатолари, айниқса полиция ишлари вазири Сензо Мчунани ишдан бўшата олмагани ва жамиятимизнинг энг заиф аъзоларини ҳимоя қила олмагани учун ишончсизлик вотуми ҳақидаги қарор лойиҳасини киритди. Биз ўз ҳаракатларимиз муваффақиятли бўлишига ишонамиз”, деди у брифингда.
Унинг қўшимча қилишича, ҳозирда қарор лойиҳасини қўллаб-қувватлаш учун бошқа парламент партиялари билан маслаҳатлашувлар олиб борилмоқда.
ЖАР собиқ президенти Жейкоб Zuma бошчилигидаги Умконто ве сизве” партияси Миллий ассамблеяда 58 та депутатлик ўринга эга. Қарор лойиҳаси қабул қилиниши учун депутатларнинг ярмидан кўпининг овози керак бўлади. Палата 400 нафар депутатдан иборат.
13 июль куни Рамапоса халққа мурожаат қилиб, жиноят оламига алоқадорликда айбланаётган полиция ишлари вазири Сензо Мчунани таътилга юборганини маълум қилди. Шунингдек, давлат раҳбари ўз кўрсатмаси билан полиция ходимлари, сиёсатчилар, судьялар ва тадбиркорларга нисбатан жиноят олами билан алоқадорлик бўйича айбловларни текшириш учун махсус комиссия тузилганини айтди. Комиссия кейинги уч ой ичида президентга ўзининг дастлабки ҳисоботини тақдим этиши лозим.
Изоҳ (0)