Milliy statistika qo‘mitasi 2025-yil 1-aprel holatiga mamlakat hududida jismoniy shaxslarga tegishli avtotransport vositalari soni bo‘yicha ma’lumotlarni e’lon qildi.
Rasmiy ma’lumotlarga ko‘ra, hisobot davrida O‘zbekistonda jismoniy shaxslarga tegishli 4 million 522,1 ming dona avtotransport vositasi ro‘yxatdan o‘tgan. Ularning asosiy qismini yengil avtomobillar tashkil etib, umumiy avtotransport vositalarining 93 foizini tashkil qilmoqda.
Qo‘mita hisobotiga asosan 2025-yilning dastlabki uch oyida avtomobillar soni 79,8 ming taga oshgan. Jismoniy shaxslarga tegishli avtotransport vositalarining turlari bo‘yicha holat quyidagicha:
- Yengil avtomobillar — 4 million 207,6 ming dona
- Yuk avtomobillari — 293,3 ming dona
- Mikroavtobuslar — 7,7 ming dona
- Maxsus transport vositalari — 7,4 ming dona
- Avtobuslar — 6,1 ming dona.
Elektromobil soni
2025-yilning 1-aprel holatiga O‘zbekistonda 65,2 mingta elektromobil ro‘yxatga olingan. Hududlar bo‘yicha elektromobillar soni:
- Toshkent shahri — 49 736 dona;
- Toshkent viloyati — 4 512 dona;
- Samarqand viloyati — 1 739 dona;
- Xorazm viloyati — 1 415 dona;
- Farg‘ona viloyati — 1 376 dona;
- Qashqadaryo viloyati — 1 338 dona;
- Buxoro viloyati — 1 133 dona;
- Navoiy viloyati — 901 dona;
- Andijon viloyati — 878 dona;
- Namangan viloyati — 700 dona;
- Qoraqalpog‘iston Resp. — 525 dona;
- Sirdaryo viloyati — 404 dona;
- Jizzax viloyati — 302 dona;
- Surxondaryo viloyati — 198 dona.
Boston Consulting Group konsalting kompaniyasi prognozlariga ko‘ra, O‘zbekiston avtomobil bozori 2030-yilgacha har yili o‘rtacha 6 foizga o‘sadi.
Uning qayd etishicha, avtomobil sektori yaqin 3—5 yilda rivojlanishiga quyidagi uch asosiy tendensiya ta’sir qiladi:
- elektromobillar va gibrid avtomobillar (XEV) savdosining oshishi;
- yanada yuqori toifadagi (premium) modellarga o‘tish;
- SUV (yo‘l va yo‘ldan tashqari — off-road haydov uchun mo‘ljallangan) modellarga bo‘lgan barqaror xaridorlar talabi.
Avtomobil bozorida barqarorlik
Joriy yil boshidan beri O‘zbekiston avtomobil bozorida barqaror faollik saqlanmoqda. Iyun oyida yengil avtomobillar savdosi hajmi maydagidan 3 foizdan ko‘proq oshdi.
Yanvar—iyun oylarida yengil avtomobillar savdosi taxminan 446 ming donadan iborat bo‘ldi. Bu 2024-yil mos davriga nisbatan 23 foizga kam.
Birlamchi avtomobil bozoridagi vaziyat
Iyunda birlamchi yengil avtomobillar savdosi maydagiga nisbatan 2,6 mingtaga (10 foizdan ortiq) o‘sdi. Bir oy davomida 23,7 ming dona mahalliy ishlab chiqarilgan yangi yengil avtomobillar sotildi. Bu ko‘rsatkich maydagiga qaraganda 15,6 foiz ko‘p.
Yangi va xorijda ishlab chiqarilgan yengil avtomobillar segmentida salbiy dinamika kuzatildi. Iyundagi savdo hajmi taxminan 4 ming donani tashkil etib, maydagiga nisbatan 12,6 foizga kamaydi.
Ikkilamchi avtomobil bozori
Markaz tahliliga ko‘ra, o‘tgan oyda 52 ming donadan ortiq foydalanilgan yengil avtomobillar sotilgan. Mazkur raqam maydagiga nisbatan 0,4 foizga kam. Umuman olganda, ikkilamchi bozorda yillik o‘sish 1,3 foizni tashkil etgan.
Izoh (0)