Iroqning Kut shahridagi savdo markazida yuz bergan yirik yong‘in oqibatida 50 ga yaqin kishi halok bo‘ldi. Mamlakatda uch kunlik motam e’lon qilindi. Bu haqda BBC xabar berdi.
Besh qavatli savdo markazini bir kechada olov qamrab olgan. Ijtimoiy tarmoqlarda tarqalgan videodan o‘t o‘chiruvchilar yong‘inni bartaraf etishga urinayotganini ko‘rish mumkin. Yong‘in yuz bergan obyekt atigi 5 kun oldin ochilgani ma’lum bo‘lgan. Muxbirlar kasalxonada kuyib ketgan jasadlarni ko‘rganini aytmoqda.
Dastlabki ma’lumotlarga ko‘ra, yong‘in birinchi qavatdan boshlangan. Hodisaga nima sabab bo‘lgani noma’lum. Tekshiruv natijalari 48 soat ichida e’lon qilinishi kutilmoqda.
Yong‘in oqibatida 50 ga yaqin odam, jumladan, erkaklar, ayollar va bolalar halok bo‘ldi. Mahalliy hokimiyat savdo markazi egasiga, shuningdek, barcha aloqadorlarga qarshi da’vo qo‘zg‘atishni boshladi. Vakolatli organlar yong‘in sabablarini o‘rganishni davom ettirmoqda, dastlabki natijalar 48 soat ichida to‘liq shaffoflik bilan jamoatchilikka e’lon qilinadi, dedi Vosit provinsiyasi gubernatori Muhammad Jamil al-Mayya.
Ta’kidlanishicha, bino va savdo markazi egasi ustidan sudga da’vo arizasi kiritilgan. O‘t o‘chiruvchilar bedarak yo‘qolganlarni qidirishda davom etmoqda. Yoshi 50 larda bo‘lgan shifokor Nosir al-Qurayshiy yong‘in oqibatida oilasining besh a’zosi halok bo‘lganini aytgan.
Boshimizga falokat tushdi. Kechki ovqatni tashqarida tanovul qilish va uyimizdagi elektr uzilishlaridan qutulish maqsadida savdo markaziga bordik. Biroq ikkinchi qavatda konditsioner portladi, so‘ng yong‘in chiqdi. Afsuski, biz undan qochib qutula olmadik, degan u AFP agentligiga bergan intervyusida.
Mahalliy ommaviy axborot vositalari tomonidan Kut markazidagi do‘kon Corniche Hypermarket Mall deb nomlangan.
Izoh (0)