Noyabr oyi oxirida Andijon viloyatida haydovchi tomonidan yuklar ustini to‘sish uchun bayroqdan yopqich sifatida foydalanilgani haqida xabar berilgan edi.
.jpg)
Unda avtomashina Shahrixon tumanida istiqomat qiluvchi fuqaroga tegishli ekani, holat bo‘yicha tegishli tartibda IIB hamkorligida harakatlar olib borilayotgani aytilgandi.
Andijon viloyati IIBB axborot xizmatining “Daryo”ga maʼlum qilishicha, ushbu fuqaroga nisbatan Jinoyat ishlari bo‘yicha Shahrixon tuman sudi tomonidan qonuniy chora ko‘rilgan.
Maʼmuriy javobgarlik to‘g‘risidagi kodeksning 203 prim 1-moddasi (davlat ramzlari to‘g‘risidagi qonunchilikni buzish) 1-qismi bilan bazaviy hisoblash miqdorining 3 baravari (1 million 20 ming so‘m) miqdorida jarima qo‘llandi, — deyiladi IIBB axborotida.
Maʼlumot uchun, Maʼmuriy javobgarlik to‘g‘risidagi kodeksning 203 prim 1-moddasi (davlat ramzlari to‘g‘risidagi qonunchilikni buzish) 1-qismi O‘zbekiston yoki Qoraqalpog‘istonning davlat bayrog‘i, davlat gerbi yoxud davlat madhiyasi to‘g‘risidagi qonunchilikni buzish — fuqarolarga bazaviy hisoblash miqdorining uch baravarigacha (1 million 20 ming so‘m), mansabdor shaxslarga esa — uch baravaridan (1 million 20 ming so‘m) yetti baravarigacha (2 million 380 ming so‘m) miqdorda jarima solishga sabab bo‘ladi.
Iyul oyida O‘zbekiston davlat bayrog‘idan foydalanish mumkin bo‘lgan holatlar kengaytirilgan edi.
Unga ko‘ra, qonun bilan bayroqqa nisbatan hurmatsizlik qilish holatlari aniq belgilandi, xususan:
- bayroqdan va uning tasviri tushirilgan belgilardan yirtilgan, ifloslangan, teshilgan, rangi oqargan holda va boshqa nomaqbul tarzda foydalanish;
- biror-bir narsa uchun ustki yoping‘ich sifatida foydalanish;
- stollarga, o‘rindiqlarga, stullarga to‘shash yoki tasvirlash, undan qoplama sifatida foydalanish, o‘tiriladigan boshqa joylarga yoki oyoq ostiga to‘shash yoki tasvirlash;
- kiyim-kechak, dastro‘mol yoki ko‘rpa-to‘shak sifatida, buyumlarni saqlash va tashish uchun foydalanish;
- bayroq tasviri tushirilgan belgilarni poyabzal, dastro‘mol, ko‘rpa-to‘shak, ichki kiyim-kechakka, sochiqlarga, qutilarga (o‘rovlarga), bir marta foydalanish va tashlab yuborish uchun mo‘ljallangan buyumlarga bosib chiqarish yoki uning tasvirini boshqacha tarzda tushirish;
- bayroq va uning tasviri tushirilgan belgilardan odob-axloq qoidalari va jamiyatda yurish-turish qoidalariga zid ravishda foydalanish mumkin emas.
Davlat bayrog‘idan va uning tasviri tushirilgan belgilardan belgilangan talablarga muvofiq foydalanish uchun masʼuliyat bayroqdan foydalanadigan jismoniy va yuridik shaxslar, davlat organlari zimmasiga yuklatiladi.
Davlat bayrog‘i to‘g‘risidagi qonunga o‘zgartirish kiritish
O‘zbekiston bayrog‘idan foydalanishdagi ayrim cheklovlar bekor qilinishi mumkinligi haqida xabar berilgan edi. 20-iyun kuni Oliy Majlis Qonunchilik palatasi deputatlari tegishli qonun loyihasini qabul qilgan. Oliy Majlis Senatining qirq ikkinchi yalpi majlisida esa davlat bayrog‘idan foydalanish imkoniyatlarini kengaytiruvchi qonun muhokama qilinib, ma’qullangandi.
Izoh (0)