Ijtimoiy tarmoqlarda Labo haydovchisi yuklar ustini to‘sish uchun bayroqdan yopqich sifatida foydalangani aks etgan foto tarqalgan edi.
Holat yuzasidan Andijon viloyati hokimligi axborot xizmati izoh berdi.
“Hozirda Andijon viloyati IIB YHXB tomonidan ushbu avtomashina Shahrixon tumanida istiqomat qiluvchi fuqaroga tegishli ekani aniqlandi. Holat bo‘yicha tegishli tartibda IIB hamkorligida harakatlar olib borilmoqda”, — deyiladi hokimlik axborotida.
Iyul oyida O‘zbekiston davlat bayrog‘idan foydalanilish mumkin bo‘lgan holatlar kengaytirilgan edi.
Unga ko‘ra, qonun bilan bayroqqa nisbatan hurmatsizlik qilish holatlari aniq belgilandi, xususan:
- bayroqdan va uning tasviri tushirilgan belgilardan yirtilgan, ifloslangan, teshilgan, rangi oqargan holda va boshqa nomaqbul tarzda foydalanish;
- biror-bir narsa uchun ustki yoping‘ich sifatida foydalanish;
- stollarga, o‘rindiqlarga, stullarga to‘shash yoki tasvirlash, undan qoplama sifatida foydalanish, o‘tiriladigan boshqa joylarga yoki oyoq ostiga to‘shash yoki tasvirlash;
- kiyim-kechak, dastro‘mol yoki ko‘rpa-to‘shak sifatida, buyumlarni saqlash va tashish uchun foydalanish;
- bayroq tasviri tushirilgan belgilarni poyabzal, dastro‘mol, ko‘rpa-to‘shak, ichki kiyim-kechakka, sochiqlarga, qutilarga (o‘rovlarga), bir marta foydalanish va tashlab yuborish uchun mo‘ljallangan buyumlarga bosib chiqarish yoki uning tasvirini boshqacha tarzda tushirish;
- bayroq va uning tasviri tushirilgan belgilardan odob-axloq qoidalari va jamiyatda yurish-turish qoidalariga zid ravishda foydalanish mumkin emas.
Davlat bayrog‘idan va uning tasviri tushirilgan belgilardan belgilangan talablarga muvofiq foydalanish uchun masʼuliyat bayroqdan foydalanadigan jismoniy va yuridik shaxslar, davlat organlari zimmasiga yuklatiladi.
Davlat bayrog‘i to‘g‘risidagi qonunga o‘zgartirish kiritish
O‘zbekiston bayrog‘idan foydalanishdagi ayrim cheklovlar bekor qilinishi mumkinligi haqida xabar berilgan edi. 20-iyun kuni Oliy Majlis Qonunchilik palatasi deputatlari tegishli qonun loyihasini qabul qilgan. Oliy Majlis Senatining qirq ikkinchi yalpi majlisida esa davlat bayrog‘idan foydalanish imkoniyatlarini kengaytiruvchi qonun muhokama qilinib, ma’qullangandi.
Izoh (0)