O‘zbekistonda bir guruh shaxslar past foizda (6-12 foiz) avtomashina sotib olmoqchi bo‘lgan fuqarolarga istalgan mashinani yetkazishni vaʼda qilgan. IIV matbuot xizmati ushbu shaxslarning suratini taqdim etdi.
Maʼlum qilinishicha, mazkur shaxslar ijtimoiy tarmoqlardagi targ‘ibot orqali Toshkent shahri va respublikaning turli nuqtalarida (Andijon, Namangan, Farg‘ona, Sirdaryo, Samarqand, Buxoro, Navoiy, Xorazm, Surxondaryo, Qashqadaryo viloyatlari hamda Nukus shahrida) MCHJlar tashkil etgan.
Jumladan, “Umid avto companies”, “Umid Savdo Fayz Invest”, “Umid Avto Lizing”, “Umid Auto”, “Group Of Companies Ual”, “Umid Avto-Tashkent”, “Orient Auto”, “Umid Lizing Tashkent”, “Orient Avto-Lizing”, “Umid Auto Leasing”, “Group Of Orient Auto”, “Imkon Auto Xizmati”, “Umid Avto Companies”, “Busines Orientauto”, “Umid Auto Xizmati”, “Orient Auto Hamkor”, “Imkon Avto Markaz”, “Avtovariant”, “Ava Orientauto”, “Ava Umidavto”, “Avto Ijara Xizmati”, “Umid Auto Business Toshkent”, “Orient Auto Leasing”, “Orient Auto Toshkent”, “Ilgor Lizing” va “Orient Finans Lizing”lar ular tomonidan tashkil etilgan.
Mazkur shaxslar mijozlar bilan dastlab bo‘nak (avans) shartnomalarini tuzgan holda, 120 kun mobaynida avtomashina yetkazilishini vaʼda qilgan. So‘ng ular shartnoma shartlarini bajarmasdan, fuqarolardan kelib tushgan mablag‘larni o‘zlashtirish bilan shug‘ullanib kelgan.
Holat yuzasidan JKning 168-moddasi 4-qismi “a,v” bandlari (firibgarlik juda ko‘p miqdorda; uyushgan guruh tomonidan yoki uning manfaatlarini ko‘zlab sodir etilgan bo‘lsa) bilan qo‘zg‘atilgan jinoyat ishi doirasida 843 nafar fuqaro jabrlanuvchi deb topilgan.
Bundan tashqari, umumiy 50,1 mlrd so‘m zarar aniqlangan. MCHJlarga tegishli 339 dona transport vositalari xatlangan.
Ishga aloqador 9 nafar shaxsga nisbatan ayblov eʼlon qilinib, “qamoq” ehtiyot chorasi qo‘llanilgan.
Hozirda maxsus tezkor shtab tuzilgan bo‘lib, IIV Transport va turizm obyektlarida xavfsizlikni taʼminlash departamenti binosida har kuni soat 09:00 dan 21:00 ga qadar ish olib bormoqda. Suratdagi shaxslarning jinoiy faoliyatidan xabardor bo‘lgan, shuningdek yuqoridagi MCHJlarning noqonuniy faoliyatidan jabrlangan fuqarolardan Tezkor shtabga yoki 102 qisqa raqamiga murojaat qilishlari so‘ralmoqda.
Manzil: Taras Shevchenko ko‘chasi, 62. Tel.: (71) 256-79-39
Izoh (0)