Markaziy bank avtokredit olish haqida qo‘llanma taqdim etdi.
Avtokredit – bu iste’mol kreditining bir turi bo‘lib, tijorat banklari tomonidan jismoniy shaxslarga aynan avtomobil sotib olish uchun ajratiladi.
Avtokredit kimlarga beriladi?
18 yoshdan katta, muntazam rasmiy daromadga ega O‘zbekiston fuqarolariga va mamlakat hududida rasmiy faoliyat olib borayotgan norezident shaxslarga avtokredit ajratiladi.
Qanday avtotransportlarni sotib olish mumkin?
Hozirgi kunda, avtokredit O‘zbekistonda ishlab chiqarilgan avtotransportlarni sotib olish uchun ajratilmoqda.
Ba’zi tijorat banklari ikkilamchi bozordan avtomobil sotib olish uchun avtokredit ajratadi.
Hujjatlar
- shaxsni tasdiqlovchi hujjat;
- daromadlar haqida ish joyidan ma’lumotnoma;
- avtomobil sotib olish shartnomasining nusxasi;
- kredit qaytarilishi ta’minotiga doir hujjatlar.
Tijorat bankining ichki siyosatidan kelib chiqib, avtokredit ta’minoti uchun quyidagilardan birini garovga qo‘yilishi mumkin:
- Kredit hisobiga sotib olinayotgan avtomashina;
- Ko‘chmas va ko‘char mulk;
- Sug‘urta polisi;
- Uchinchi shaxs kafilligi;
- O‘zbekiston Respublikasi qonuni bilan taqiqlanmagan boshqa garov turlari.
Kreditni to‘lash usuli – annuitet (kredit muddati davomida bir xil to‘lov) yoki differensial (oyma-oy kamayib borish tartibida) bo‘lishi mumkin.
Imtiyozli davr – bank kredit bo‘yicha asosiy qarz to‘lovlarini talab etmaydigan davr. Ushbu davr mobaynida faqatgina kredit foizlari to‘lanadi.
Boshlang‘ich to‘lovni amalga oshirish uchun mablag‘ yetarli bo‘lmagan holda, boshqa kredit (masalan, mikroqarz) olish maslahat berilmaydi, chunki bu qarzdorning qarz yukini oshirib yuborishga olib kelishi mumkin.
Avtokredit – bu javobgarlik. Agar kredit bo‘yicha to‘lovlar o‘z vaqtida amalga oshirilmay qolsa, bu salbiy kredit tarixiga sabab bo‘lishi mumkin. Bunday vaziyatda muddati o‘tgan qarzdorliklar kredit ta’minoti bo‘lgan mashinani sotish evaziga qoplanishi mumkin.
Fevralda avtokreditlar bo‘yicha foiz stavkalar 19 foizdan 27 foizgacha bo‘lgan edi. Asosiy stavka ko‘tarilgandan keyin ular yana 2-3 foizga oshgan.
Izoh (0)