AQSH prezidenti ma’muriyati ayrim Afrika davlatlariga noqonuniy migrantlarni qabul qilish bo‘yicha rasmiy taklif yubordi. Bu haqda manbalarga tayanib The Wall Street Journal xabar berdi.
Bu taklif Gabon, Gvineya Bisau, Liberiya, Mavritaniya va Senegal hukumatlariga yo‘llangan. Gap AQSHdan deportatsiya qilinayotgan, ammo o‘z vatani qaytarib olishdan bosh tortayotgan yoki jarayonni kechiktirayotgan migrantlar haqida ketmoqda. Ma’muriyat bunday hamkorlik AQSH bilan savdo aloqalarini kuchaytirishga xizmat qilishini ta’kidlagan.
Tramp ushbu davlatlar yetakchilari bilan iqtisodiy va xavfsizlik masalalariga bag‘ishlangan sammit doirasida uchrashuv o‘tkazishni rejalashtirgan. Uchrashuv oldidan Afrika yetakchilariga Tramp uchun noqonuniy muhojirlarni deportatsiya qilish masalasi ustuvor yo‘nalish ekani yetkazilgan. Mazkur taklifga ularning rozilik bildirgani yoki yo‘qligi hozircha noma’lum.
AQSH prezidenti ma’muriyati Moldova va Kosovoga ham shu mazmundagi norasmiy takliflar yuborgani xabar qilingandi. Bundan tashqari, AQSH Benin, Ruanda, Liviya, Esvatini va Mo‘g‘uliston bilan ham deportatsiya masalasida muzokaralar olib bormoqda.
AQSHda noqonuniy bo‘lib turganlar deportatsiya qilinishi
AQSH prezidenti Donald Tramp maʼmuriyati noqonuniy migrantlarni sudsiz deportatsiya qilishga ruxsat bergan. Tramp saylovoldi kampaniyasidayoq muhojirlarni ommaviy deportatsiya qilishga va’da bergan. 2025-yil fevralida Kosta Rika O‘zbekiston, Qozog‘iston, Qirg‘iziston, Pokiston va Hindiston kabi davlatlarning AQSHdan deportatsiya qilingan 200 nafar fuqarosini qabul qilishga rozi bo‘ldi.
O‘zbekiston tashqi ishlar vaziri matbuot kotibi Ahror Burhonov diplomatik vakolatxonalar O‘zbekistonning barcha fuqarolariga, ular qayerda bo‘lishidan qat’i nazar, har tomonlama yordam ko‘rsatishini aytdi. 2025-yil fevralida 7 nafari Nyu York—Toshkent yo‘nalishi bo‘yicha O‘zbekistonga olib kelindi. Mart oyi boshlarida yana 10 nafar fuqaro AQSHdan O‘zbekistonga qaytarildi.
Deportatsiya qilinadigan O‘zbekiston fuqarolari soni 975 kishini tashkil etmoqda. Umumiy hisobda, turli davlatlardan 1 445 549 nafar chet el fuqarosi chiqarib yuboriladi. AQSHdan 2023-yil sentyabrdan 2024-yil sentyabrgacha O‘zbekistonga 572 kishi deportatsiya qilingan.
AQSHda migrantlar uchun o‘z-o‘zini deportatsiya qilishga mo‘ljallangan ilova ishga tushirilgan. CBP Home deb nomlangan mobil ilova noqonuniy migrantlarga hibsga olinmasdan, mamlakatni mustaqil ravishda tark etish imkonini beradi. Ular keyinchalik qonuniy ravishda qaytib kelishi mumkin bo‘ladi.
Izoh (0)