Fransiya kinematografiyasi ramzi Jeyn Birkinga tegishli bo‘lgan asl Hermes Birkin sumkasi Sotheby’s kimoshdi savdosida 7 million yevroga sotildi. Bu haqda Associated Press xabar berdi. Savdo 1 million yevrodan boshlandi. Sotheby’s vakilining aytishicha, yakuniy narx sumka sotilishi bo‘yicha yangi rekord o‘rnatdi.
Ilgari kimoshdi savdosida sotilgan eng qimmat aksessuar Hermes sumkasining boshqa modeli — timsoh terisidan yasalgan va olmoslar bilan bezatilgan Retourne Kelly 28 edi. Xaridor uni yarim million dollarga sotib olgandi.
Bu afsonaviy aksessuar 1984-yilda Birkin uchun maxsus tayyorlangan edi. Aynan shu aktrisa sharafiga nomlangan sumka keyinchalik barcha Birkin sumkalariga asos bo‘ldi.
Asl sumka zamonaviy Birkin’lardan biroz farq qiladi. Uning o‘lchami boshqacha, tasmasi olinmaydigan, pastki qismidagi mixparchinlarning shakli o‘zgacha va ichki fermuar boshqa ishlab chiqaruvchiga tegishli. Sumka to‘plamiga aktrisa tashqaridan osib yuradigan soch uchun qisqichi ham kiradi.
Jeyn Birkin 1946-yil 14-dekabrda Londonda tug‘ilgan. Uning karyerasi Mikelanjelo Antonionining “Fotokattalashtiruv” va Jek Smaytning “Kaleydoskop” filmlarida rol o‘ynaganidan so‘ng yuksaldi. Keyinchalik u 80 dan ortiq filmda suratga tushdi va 20 ta musiqa albomini chiqardi. Aktrisa 2023-yilda 76 yoshida vafot etdi.
Izoh (0)