2025-yil 28-iyun kuni mashhur milliarder va texnologik innovator Ilon Mask 54 yoshga to‘ldi. U uzoq yillardan beri boshqa sayyoralarga borishni jiddiy maqsad qilgan. Yerda esa u egalik qilgan barcha hashamatli uylarini sotib yuborib, bundan buyon hech qanday ko‘chmas mulkka egalik qilmaslikka qaror qilgan. Biroq u ilgari o‘ziga xos va noyob uylarda yashagan.
“Bumerang” uy
Los Anjelesda Mask yettita uyga egalik qilgan. Ulardan biri bolalari uchun dars xonasi sifatida ishlatilgan. Barcha hovlilar bir-biriga yaqin joylashgan. 2024-yil yozida Mask to‘rtta uyni sotgan va yangi xonadon egasi bu yerda katta hovli qurishni rejalashtirgan.
Milliarderga tegishli uylardan biri arxitekturasi bilan ajralib turadigan “bumerang” shaklidagi xonadon bo‘lib, uni Mask 4,5 million dollarga sotgan. Uyning umumiy maydoni 914 metr kvadrat bo‘lsa-da, zamonaviy tarzda loyihalangan: mehmonxona va ovqatlanish zonasidan suriluvchi eshiklar orqali hovuzga chiqiladi.
Hovuzning qarama-qarshi qismida esa yotoq va hammomlar joylashgan, har birida bog‘ga qaraydigan deraza bor. Uyning tashqi tomoni yopiq, ichkarida esa ochiq hovuz, yerosti garaji va “aqlli uy” tizimi mavjud. Yoritish, shamollatish, isitish va musiqa boshqaruvi kabilar mobil telefon orqali boshqariladi.
30 million dollarlik saroy
2020-yil yozida Mask eng qimmat mulkidan voz kechdi. U Bel Eyr rayonidagi uyini 2012-yilda 17 million dollarga sotib olgan edi. Mask uyni 29 million dollarga xitoylik videoo‘yinlar biznesi orqali boyigan milliarderga sotdi.
Bu uy hashamat va ko‘ngilochar zonalarga to‘la: ikki qavatli kutubxona, xususiy kinoteatr, sport zalidan tashqari vino kolleksiyasi uchun alohida xona mavjud. 1500 metr kvadratli uyning ichki ko‘rinishi klassik uslubida qurilgan. Mask uni xarid qilishdan oldin uzoq yillar ijarada yashagan va faqat yengil ta’mirlash bilan cheklangan. Hovlisida tennis korti va ochiq osmon ostida ovqatlanish uchun joylar bor. Garaj esa to‘rt nafar Tesla avtomobiliga mo‘ljallangan.
Jin Uaylderning uyi
Bel Eyr hududida yana bir mashhur uy — amerikalik aktyor Jin Uaylderning sobiq xonadoni joylashgan. U 1971-yilgi “Villi Vonka va shokolad fabrikasi” filmidagi roli bilan tanilgan. Mask uyni 7 million dollarga sotgan, ammo aktyorga bitta shart qo‘ygan: unga ko‘ra, yangi uy egasi interyerni o‘zgartirmasligi kerak bo‘lgan. Aktyor esa bunga rozilik bildirgan.
U aynan shu uyni Mask “Ad Astra” (lotincha “yulduzlar tomon”) nomli xususiy maktabga aylantirgan edi. Bu maktabda milliarderning farzandlari va ba’zi xodimlarining bolalari tahsil olgan.
Yana bir 30 million dollarlik uy
Mask keyinchalik yana bir hashamatli uyini sotuvga qo‘ydi — bu safar Los Anjeles manzarasini to‘liq ko‘rish mumkin bo‘lgan tepalikdagi inshoot bo‘ldi. Uy atrofidagi uchta boshqa bino ham Maskka tegishli bo‘lgan va ularning barchasi sotilgan.
2 800 metr kvadratli bu uy Maskning odatiy klassik uslubidan farq qilib, zamonaviy va minimalistik dizaynga ega. Oppoq kub shaklidagi bloklardan iborat bino panoramali derazalari bilan shaharga qaragan. Old qismida ochiq hovuz joylashgan.
Ixcham kottej
Yuqoridagi qimmatbaho uyning qo‘shnisi bo‘lgan yana bir kottej — Maskning eng past narxga sotilgan uyi sanaladi. Xonadon 4,443 million dollarga xarid qilingan. An’anaviy uslubdagi bu uyda yog‘och mebellar asosiy o‘rin egallagan, bolalar xonalari esa malikalarga xos dizaynda bezatilgan. Maskning birinchi turmushidan besh farzandi, yangi juftidan esa yana bir farzandi bor.
Silikon vodiysidagi hashamatli ko‘chmas mulk
Maskning Kaliforniyadan tashqaridagi yirik hovlilaridan biri Silikon vodiysidagi saroy bo‘lib, u yerda tadbirkorning turli kompaniyalari joylashgan. U 5000 metr kvadrat bo‘lib, 10 ta yotoqxona, 10 ta hojatxona, ulkan garaj va katta hajmdagi ziyofatlar uchun mo‘ljallangan ovqatlanish xonasidan iborat.
Texasdagi uy
So‘nggi yillarda Mask o‘zining asosiy yashash joyi sifatida oddiyroq joyni tanladi. Bu Texas shtatidagi SpaceX zavodidan yarim soatlik yo‘l uzoqlikda joylashgan xonadon bo‘lib, u atigi 50 ming dollarga xarid qilingan.
Mask bir intervyusida shunday degan:
“Uyim juda kichkina. Men raketalar zavodiga piyoda boraman. Yolg‘iz bo‘lsam, menga juda qulay. Ammo do‘stlarim tashrif buyurganida ular bu joyda yashayotganimni bilib, ko‘zlariga ishonmaydi”.
Izoh (0)