2025 йил 28 июнь куни машҳур миллиардер ва технологик инноватор Илон Маск 54 ёшга тўлди. У узоқ йиллардан бери бошқа сайёраларга боришни жиддий мақсад қилган. Ерда эса у эгалик қилган барча ҳашаматли уйларини сотиб юбориб, бундан буён ҳеч қандай кўчмас мулкка эгалик қилмасликка қарор қилган. Бироқ у илгари ўзига хос ва ноёб уйларда яшаган.
“Бумэранг” уй
Лос Анжелесда Маск еттита уйга эгалик қилган. Улардан бири болалари учун дарс хонаси сифатида ишлатилган. Барча ҳовлилар бир-бирига яқин жойлашган. 2024 йил ёзида Маск тўртта уйни сотган ва янги хонадон эгаси бу ерда катта ҳовли қуришни режалаштирган.
Миллиардерга тегишли уйлардан бири архитектураси билан ажралиб турадиган “бумеранг” шаклидаги хонадон бўлиб, уни Маск 4,5 миллион долларга сотган. Уйнинг умумий майдони 914 метр квадрат бўлса-да, замонавий тарзда лойиҳаланган: меҳмонхона ва овқатланиш зонасидан сурилувчи эшиклар орқали ҳовузга чиқилади.
Ҳовузнинг қарама-қарши қисмида эса ётоқ ва ҳаммомлар жойлашган, ҳар бирида боғга қарайдиган дераза бор. Уйнинг ташқи томони ёпиқ, ичкарида эса очиқ ҳовуз, ерости гаражи ва “ақлли уй” тизими мавжуд. Ёритиш, шамоллатиш, иситиш ва мусиқа бошқаруви кабилар мобил телефон орқали бошқарилади.
30 миллион долларлик сарой
2020 йил ёзида Маск энг қиммат мулкидан воз кечди. У Бел Эйр районидаги уйини 2012 йилда 17 миллион долларга сотиб олган эди. Маск уйни 29 миллион долларга хитойлик видеоўйинлар бизнеси орқали бойиган миллиардерга сотди.
Бу уй ҳашамат ва кўнгилочар зоналарга тўла: икки қаватли кутубхона, хусусий кинотеатр, спорт залидан ташқари вино коллекцияси учун алоҳида хона мавжуд. 1500 метр квадратли уйнинг ички кўриниши классик услубида қурилган. Маск уни харид қилишдан олдин узоқ йиллар ижарада яшаган ва фақат енгил таъмирлаш билан чекланган. Ҳовлисида теннис корти ва очиқ осмон остида овқатланиш учун жойлар бор. Гараж эса тўрт нафар Tesla автомобилига мўлжалланган.
Жин Уайлдернинг уйи
Бел Эйр ҳудудида яна бир машҳур уй — америкалик актёр Жин Уайлдернинг собиқ хонадони жойлашган. У 1971 йилги “Вилли Вонка ва шоколад фабрикаси” фильмидаги роли билан танилган. Маск уйни 7 миллион долларга сотган, аммо актёрга битта шарт қўйган: унга кўра, янги уй эгаси интерерни ўзгартирмаслиги керак бўлган. Актёр эса бунга розилик билдирган.
У айнан шу уйни Маск “Ад Астра” (лотинча “юлдузлар томон”) номли хусусий мактабга айлантирган эди. Бу мактабда миллиардернинг фарзандлари ва баъзи ходимларининг болалари таҳсил олган.
Яна бир 30 миллион долларлик уй
Маск кейинчалик яна бир ҳашаматли уйини сотувга қўйди — бу сафар Лос Анжелес манзарасини тўлиқ кўриш мумкин бўлган тепаликдаги иншоот бўлди. Уй атрофидаги учта бошқа бино ҳам Маскка тегишли бўлган ва уларнинг барчаси сотилган.
2 800 метр квадратли бу уй Маскнинг одатий классик услубидан фарқ қилиб, замонавий ва минималистик дизайнга эга. Оппоқ куб шаклидаги блоклардан иборат бино панорамали деразалари билан шаҳарга қараган. Олд қисмида очиқ ҳовуз жойлашган.
Ихчам коттеж
Юқоридаги қимматбаҳо уйнинг қўшниси бўлган яна бир коттеж — Маскнинг энг паст нархга сотилган уйи саналади. Хонадон 4,443 миллион долларга харид қилинган. Анъанавий услубдаги бу уйда ёғоч мебеллар асосий ўрин эгаллаган, болалар хоналари эса маликаларга хос дизайнда безатилган. Маскнинг биринчи турмушидан беш фарзанди, янги жуфтидан эса яна бир фарзанди бор.
Силикон водийсидаги ҳашаматли кўчмас мулк
Маскнинг Калифорниядан ташқаридаги йирик ҳовлиларидан бири Силикон водийсидаги сарой бўлиб, у ерда тадбиркорнинг турли компаниялари жойлашган. У 5000 метр квадрат бўлиб, 10 та ётоқхона, 10 та ҳожатхона, улкан гараж ва катта ҳажмдаги зиёфатлар учун мўлжалланган овқатланиш хонасидан иборат.
Техасдаги уй
Сўнгги йилларда Маск ўзининг асосий яшаш жойи сифатида оддийроқ жойни танлади. Бу Техас штатидаги SpaceX заводидан ярим соатлик йўл узоқликда жойлашган хонадон бўлиб, у атиги 50 минг долларга харид қилинган.
Маск бир интервьюсида шундай деган:
“Уйим жуда кичкина. Мен ракеталар заводига пиёда бораман. Ёлғиз бўлсам, менга жуда қулай. Аммо дўстларим ташриф буюрганида улар бу жойда яшаётганимни билиб, кўзларига ишонмайди”.
Изоҳ (0)