O‘zbekistonda 2025/26-o‘quv yili uchun davlat oliy ta’lim muassasalarining bakalavriatiga o‘qishga kirish uchun abituriyentlarni onlayn ro‘yxatga olish yakunlandi.
Oliy ta’lim, fan va innovatsiyalar vazirligining ma’lum qilishicha, qabul yakuniga ko‘ra onlayn ro‘yxatdan o‘tgan abituriyentlar soni 732 411 nafarni tashkil etdi.
Abituriyentlarning ta’lim tili bo‘yicha taqsimoti:
- o‘zbek tili — 644 027 nafar;
- rus tili — 71 476 nafar;
- qoraqalpoq tili — 14 959 nafar;
- boshqa tillar — 1 949 nafar.
Abituriyentlarning gender tarkibi bo‘yicha taqsimoti:
- erkaklar — 346 299 nafar;
- ayollar — 386 112 nafar.
Ro‘yxatdan o‘tgan abituriyentlar soni so‘nggi 7 yildagi eng kam miqdorni tashkil etdi
Oxirgi 7 yildagi abituriyentlar soniga qaralsa, joriy yilda ro‘yxatdan o‘tganlar eng kam miqdorni tashkil etganini ko‘rish mumkin:
- 2019-yil — 1 mln 66 ming 925 nafar;
- 2020-yil — 1 mln 484 ming 85 nafar;
- 2021-yil — 948 ming 211 nafar;
- 2022-yil — 1 mln 214 ming 232 nafar;
- 2023-yil — 1 mln 18 ming 7 nafar;
- 2024-yil — 894 ming 279 nafar;
- 2025-yil — 732 ming 411 nafar.
Ro‘yxatdan o‘tgan abituriyentlar test sinovi uchun to‘lovni 26-iyun kuni soat 23:59 ga qadar amalga oshirishi mumkin.
Joriy yil bitirganlar uchun testga kirish tekin, avvalgi yillarda bitirganlar 187 ming 500 so‘m to‘lashi kerak. To‘lovni amalga oshirmagan abituriyentlar ro‘yxatdan o‘tmagan deb hisoblanadi va test sinovlariga qo‘yilmaydi.
Quyidagilar ham to‘lovdan ozod qilingan:
- Mehribonlik uyi va Bolalar shaharchalari bitiruvchilari;
- to‘liq davlat taʼminotidagi shaxslar;
- nogironligi bor shaxslar;
- ijtimoiy himoya yagona reyestriga kiritilgan shaxslar va ularning farzandlari;
- “Yoshlar daftari”ga kiritilgan yoshlar.
Prezident farmoniga ko‘ra, 2025/26-o‘quv yilidan boshlab O‘zbekiston oliy ta’lim tizimida sirtqi shaklda o‘qishga qabul to‘liq to‘xtatildi. Sirtqi taʼlim o‘rniga kunduzgi ta’limdan boshqa muqobil ta’lim shakllari bo‘yicha qabul kvotalari bosqichma-bosqich oshirib boriladi.
Oliy ta’lim, fan va innovatsiyalar vazirligi ma’lumotlariga ko‘ra, ayni vaqtda O‘zbekistonda jami 201 ta oliygoh faoliyat yuritmoqda.
Izoh (0)