Ehtiyojmand oilalardagi xotin-qizlarga 2025/26-o‘quv yili uchun OTMlarga kirishga tavsiyanoma olish uchun arizalar qabuli boshlandi. Bu haqda Oila va xotin-qizlar qo‘mitasi axborot xizmati rahbari Saodat Boymirzayeva xabar berdi.
Tavsiyanoma olish uchun talabgorlar Oila va xotin-qizlar qo‘mitasining axborot tizimi — tavsiyanoma.ijro.uz orqali 30-maydan 8-iyungacha onlayn ariza qoldirishi lozim.
Tavsiyanoma 6 ta mezon asosida beriladi:
- kam ta’minlangan oilalardagi xotin-qizlar;
- to‘liqsiz oilada tarbiyalanayotgan ijtimoiy himoyaga muhtoj qizlar;
- turmush o‘rtog‘i vafot etgan, farzandini yolg‘iz tarbiyalayotgan ayollar;
- nogironligi bo‘lgan farzandi bor ayollar;
- ikki va undan ortiq farzandlarini ijarada yoki alohida tarbiyalayotgan yolg‘iz ayollarning qizlari;
- ota-onasidan biri yoki har ikkalasi birinchi/ikkinchi guruh nogironi bo‘lgan xotin-qizlar.
Tavsiyanoma egasi abituriyent sifatida ro‘yxatdan o‘tishda faqat tanlagan birinchi ta’lim yo‘nalishi bo‘yicha qo‘shimcha 4 foizli davlat granti asosida tanlovda ishtirok etadi. Kirish imtihonida eng yuqori ballning kamida 30 foizini to‘plagan tavsiyanomaga ega bo‘lganlar ballar ketma-ketligiga rioya etilgan holda talabalikka tavsiya etiladi.
Ushbu tavsiyanoma ehtiyojmand oilalardagi xotin-qizlarga bir yil muddatga beriladi. 2024-yilda 36 853 nafar talabgor xotin-qizdan tavsiyanoma olish uchun arizalar onlayn qabul qilingan.
Mutaxassisligi bo‘yicha kamida 5 yil ish stajiga bor, oliy ma’lumotga ega bo‘lmagan xotin-qizlar davlat OTMlariga alohida qabul kvotalari asosida o‘qish imkoniyatiga ega. Talabgor xotin-qizlarga tavsiyanoma uchun 31-may (shu kuni ham) kuniga qadar o‘zlari yashab turgan hududdagi tuman (shahar) oila va xotin-qizlar bo‘limlariga murojaat qilishlari kerak.
O‘zbekistonda xotin-qizlarning oliy ta’limdagi qamrovi
So‘nggi yillarda mamlakatda ayollarning oliy ta’limdagi qamrovi qariyb 53 foizga, magistraturada 62,7 foizga yetdi, foizsiz ta’lim kreditlari, ehtiyojmand qizlarga grantlarning ajratilishi, xotin-qizlarning magistraturadagi ta’limi uchun mablag‘lar davlat tomonidan qoplab berilishi kabi juda katta imtiyozlar bevosita oliy ta’limdagi xotin-qizlar ulushining ortib borishiga xizmat qilmoqda.
Oxirgi 2 yilning o‘zida xotin-qizlarning 400 mingga yaqiniga 4,3 trillion so‘m ta’lim krediti ajratilgan, Oliy ta’lim bo‘yicha 2017-yilga nisbatan bakalavriatda 39 foizdan 52,2 foizga ko‘tarilgan (23 foizga oshgan), magistraturadagi talaba qizlar soni 2018-yilga nisbatan 3,8 barobarga ortgan.
Izoh (0)