O‘zbekistonda professional ta’lim muassasalariga tanlov 18-avgustdan boshlanadi. Bu haqda Oliy ta’lim, fan va innovatsiyalar vazirligi xabar berdi.
“Oliy va professional ta’lim muassasalariga kirish test sinovlarida ishtirok etgan abituriyentlar 2024-yil 18-avgustdan 27-avgustga qadar 10 kun davomida ‘my.uzbmb.uz’ saytida kollej yoki texnikum, kasb va mutaxassislik hamda ta’lim shaklini tanlashlari lozim”, deyiladi xabarda.
Shuningdek, abituriyentlar muddati yakunlangunga qadar o‘z tanlovlarini o‘zgartirishlari mumkinligi xabar qilingan.
Abituriyentlarning talabalikka tavsiya etilgan yoki etilmagani to‘g‘risidagi yakuniy tanlov natijalari tanlash to‘liq yakunlangandan so‘ng bir hafta muddatda e’lon qilinadi.
Avvalroq 2024–2025-o‘quv yili uchun oliy ta’lim muassasalarining bakalavriat ta’lim yo‘nalishlariga kirish test sinovlari bo‘yicha tanlov natijalari e’lon qilingandi.
Bilim va malakalarni baholash agentligi tanlov natijalarini 4 xil usulda bilish mumkinligini xabar bergan.
Izoh (0)