O‘zbekistonda oliy ta’lim muassasalariga kirish test sinovi uchun to‘lov undirilmaydigan abituriyentlar toifasi kengaydi. Bu haqda Davlat test markazi xabar qildi.
Qayd etilishicha, test sinovlari tashkil etilayotgan o‘quv yilidan avvalgi yillarda ta’lim muassasalarini tugatgan abituriyentlardan test sinovlarida ishtirok etishi uchun bazaviy hisoblash miqdorining yarim baravari miqdorida to‘lov undiriladi. Bunda quyidagi toifadagi abituriyentlardan to‘lov undirilmaydi:
- test sinovlari tashkil etilayotgan yilda ta’lim muassasalarini tugatgan abituriyentlar;
- nogironligi bo‘lgan shaxslar;
- to‘liq davlat ta’minotidagi shaxslar (Mehribonlik uyi va Bolalar shaharchasining bitiruvchilari).
- “Ijtimoiy himoya yagona reyestri” axborot tizimida ro‘yxatga olingan shaxslar va ularning farzandlari;
- “yoshlar daftari”ga kiritilgan yoshlar.
Eslatib o‘tamiz, O‘zbekistonda 2019-yilgi test sinovlarida abituriyentlardan qariyb 900 mln so‘m ortiqcha to‘lov undirilgandi. DTM holatga munosabat bildirib, “to‘lovni amalga oshirmaydigan abituriyentlar tomonidan hujjatlarni topshirish jarayonida test sinovi uchun to‘lovni amalga oshirish holatlari kuzatilgani, buning natijasida 896,4 million so‘m ortiqcha to‘lov amalga oshirilgan”ini ma’lum qilgan.
Izoh (0)