Test natijalaridan norozi abituriyentlar qachondan apellyatsiya berishi ma’lum bo‘ldi

Oliy ta’lim muassasalarining bakalavriat ta’lim yo‘nalishlariga kirish test sinovlari natijasidan norozi bo‘lgan abituriyentlar apellatsiya arizalarini “my.uzbmb.uz” saytida (shaxsiy kabineti orqali) onlayn tarzda 18-avgustdan 27-avgustga qadar (10 kun davomida) berishlari mumkin. Bu haqda Bilim va malakalarni baholash agentligi ma’lum qildi.

Abituriyent apellatsiya shikoyati berishi uchun test sinovida ishtirok etgan va test sinovidan chetlatilmagan bo‘lishi lozim. Apellatsiya arizasini bergan abituriyentga uni ko‘rib chiqish sanasi va vaqti ko‘rsatilgan xabarnoma taqdim qilinadi. Abituriyent xabarnomada belgilangan vaqtda shaxsini tasdiqlovchi hujjat va xabarnoma bilan Bilimni baholash agentligiga kelishi lozim. Apellatsiya shikoyatlarini ko‘rib chiqish 2024-yil 22-avgustdan boshlanadi. 

Eslatib o‘tamiz, bakalavriat ta’lim yo‘nalishlariga kirish test sinovlari bo‘yicha mandat e’lon qilindi. Tanlov natijalarini 4 xil usulda bilish mumkin.

1. “my.uzbmb.uz” sayti orqali:

“my.uzbmb.uz” saytiga abituriyentning pasport seriyasi va raqami hamda shaxsiy identifikatsiya raqamini kiritgan holda.

2. “mandat.uzbmb.uz” sayti orqali:

“mandat.uzbmb.uz” saytiga abituriyentning ID raqamini kiritgan holda.

3. SMS-xabarnoma xizmati orqali:

5100 raqamiga abituriyentning ID raqami yuborilganda, mazkur telefon raqamiga tanlov natijalari bo‘yicha SMS-xabarnoma yuboriladi (xizmat haqi mavjud).

4. Test natijalari qaydnomasi orqali:

Mazkur qaydnomalar oliy ta’lim muassasalariga taqdim etiladi.