O‘zbekiston oliygohlarida to‘lov-kontrakt narxlari yo‘nalishlar va shart-sharoitlarga qarab turlicha belgilanadi. Eng past qiymatdagi shartnoma miqdori 6,4 million so‘m bo‘lsa, ayrim xususiy universitetlarda yillik shartnoma summasi 100 million so‘mgacha yetadi.
Hozirgi kunda respublikada 111 ta davlat, 67 ta xususiy oliy taʼlim muassasalari (OTM) faoliyat yuritmoqda. “Daryo” davlat va nodavlat universitetlarning bakalavriat yo‘nalishi bo‘yicha (kunduzgi taʼlim) to‘lov-kontrakt narxlari yiliga qanchaligi bilan qiziqdi.
Davlat OTMlaridagi narxlar
Davlatga qarashli OTMlarida to‘lov-kontrakt narxlari oxirgi marta 2019/2020-o‘quv yilida 18 foizga oshirilgan. 2019-yil 1 sentyabrdan stipendiyali va stipendiyasiz to‘lov-shartnoma tizimi joriy etilgan. Oliy taʼlim, fan va innovatsiyalar vazirligi 2023/2024-o‘quv yili uchun bakalavriat taʼlim yo‘nalishlari bo‘yicha shartnoma to‘lovlari miqdorini (o‘zgarmagan) eʼlon qilgan.
O‘tgan o‘quv yilida davlat OTMlarining pedagogika, aniq va tabiiy fanlar yo‘nalishlarida tahsil olish yiliga 6,4 million so‘mni tashkil etgan.
Sanʼat yo‘nalishida o‘qish 7,8 million so‘m, iqtisod 9,1 million so‘m, jahon iqtisodiyoti va xalqaro iqtisodiy munosabatlar hamda huquq yo‘nalishlaridagi taʼlim yiliga 9,8 million so‘m bo‘lgan.
Kompyuter texnologiyalari va informatika, aloqa va axborotlashtirish, telekommunikatsiya texnologiyalari, arxitektura va qurilish yo‘nalishlarida tahsil olish 7 million so‘m etib belgilangan. Sog‘liqni saqlash bo‘yicha o‘qish yiliga 9,1 million so‘mni tashkil etgan.
Xususiy universitetlardagi narxlar
O‘zbekistondagi xususiy universitetlarda to‘lov-kontrakt narxlari davlat OTMlaridagiga qaraganda ancha yuqoriligini ko‘rish mumkin. Masalan, Central Asian university (sobiq Akfa universiteti) rasmiy saytida yo‘nalishlar kesimida har bir semester uchun shartnoma narxlari ko‘rsatilgan. Universitetda eng yuqori to‘lov-kontrakt narxi tibbiyot yo‘nalishida bo‘lib, bir semester uchun to‘lov qiymati 50 million so‘mni (yiliga 100 million so‘m) tashkil etadi.
Turizm va mehmonxona boshqaruvi, xalqaro biznes, logistika yo‘nalishlarida to‘lov-kontrakt summasi 37,5 million so‘m (1 semester uchun). Buxgalteriya, moliya, iqtisodiyot, marketing, menejment, jamoatchilik bilan aloqalar va OAVni boshqarish fakultetlarida tahsil olish narxi 25 million so‘mdan.
Muhandislik 21,9 million so‘m, ingliz tilini o‘qitish va taʼlimni boshqarish fakultetida o‘qish 18,8 million so‘m.
TEAM tadbirkorlik va biznes universitetida o‘qish uchun shartnoma to‘lovi yiliga 38,3 million so‘m hisoblanadi. Universitetda turizm va mehmonxona boshqaruvi, xalqaro biznes, raqamli innovatsiyalar, marketing yo‘nalishlari bor. Barcha yo‘nalishlarga to‘lov narxi bir xil ko‘rsatilgan.
Cambridge international university saytida beshta yo‘nalishdagi to‘lov-kontrakt narxlari ko‘rsatilgan. Qayd etilishicha, universitetning axborot texnologiyalari, biznes menejment, buxgalteriya hisobi va moliya yo‘nalishlarida bir yil o‘qish 25 million so‘m. Ingliz tilini o‘qitish va biznes boshqaruvi yo‘nalishlarida esa bu raqam 18 million so‘m.
Profi university’dagi bank ishi va audit, buxgalteriya hisobi va audit, iqtisodiyot, turizm yo‘nalishlarida bir yil o‘qish (kunduzgi taʼlim) narxi 16,9 million so‘mni tashkil etadi. Pedagogiga sohasidagi o‘zbek, ingliz, rus tillari va adabiyotlari, marketing yo‘nalishlarining to‘lov-kontrakt miqdori 16,2 million so‘mligi yozilgan. Axborot tizimlari va texnologiyalari yo‘nalishida yillik tahsil olish 18,1 million so‘m.
Yangi asr universitetida o‘qish narxlari ham oliygoh rasmiy saytiga joylangan. Universitetning iqtisodiyot, buxgalteriya hisobi, filologiya va tillarni o‘qitish yo‘nalishlarida bir yillik kunduzgi taʼlim olish 19 million so‘mni tashkil etadi. Psixologiya, pedagogika yo‘nalishlarida o‘qish esa 18 million so‘m, dizayn yo‘nalishida tahsil 20 million so‘m.
EMU university ham yillik to‘lov-kontrakt narxlarini eʼlon qilgan. Universitetda stomotologiya, davolash ishi yo‘nalishlarida bir yil o‘qish miqdori 54,9 million so‘m, pediatriya, farmatsiya yo‘nalishlari 36,7 million so‘m, biologiya 11,9 million so‘m, kimyo 12,9 million so‘m.
TMC institute’ning ham to‘lov–kontrakt narxlari yo‘nalishlarga qarab o‘zgaradi. Masalan, institutda axborot tizimlari va texnologiyalari yo‘nalishida bir yil o‘qish narxi 30 million so‘mni tashkil etadi. Qolgan iqtisodiyot, buxgalteriya, bank ishi va audit, logistika, moliya va moliyaviy texnologiyalari, pedagogika yo‘nalishlarida to‘lov-kontrakt miqdori yiliga 18 million so‘m etib belgilangan.
Izoh (0)