Amerikalik milliarder Ilon Maskka tegishli SpaceX kompaniyasi Falcon 9 raketasi yordamida kosmosga 150 dan ortiq DNK kapsulalari va inson qoldiqlarini olib chiqadi. Bu haqda Space xabar berdi.
Ma’lumotlarga ko‘ra, mazkur yodgorlik yuklari Celestis kompaniyasi hamkorligida orbitaga uchiriladi. Missiya doirasida Yevropada ishlab chiqilgan Nyx nomli kosmik kemaning sinov parvozi ham amalga oshiriladi. Uchish 24-iyun kuni bo‘lib o‘tishi kutilmoqda.
Rejaga ko‘ra, Nyx kosmik kemasining to‘liq versiyasi 2028-yilda kosmosga uchadi va Xalqaro kosmik stansiya bilan ulanishi kerak. Joriy parvozda kema Yer atrofidagi past orbitaga chiqib, ikki yoki uch marta aylanadi, so‘ng Yer atmosferasiga kiradi. Shundan so‘ng yodgorlik kapsulalari Tinch okeaniga tushiriladi, u yerdan esa ular yig‘ib olinib, mijozlarga esdalik sifatida qaytariladi.
Celestis kompaniyasi tarixda birinchi marta uch yoshli Matteo Bartning DNK namunalarini kosmosga yuboradi. Natijada u kosmosga DNKsi yuborilgan eng yosh nemis, hatto butun Yevropadagi eng yosh inson sifatida tarixda qoladi. U ramziy ravishda marhum bobosi Diter Bart bilan birga parvoz qiladi. Chunki bobosining krematsiya qilingan qoldiqlari ham ushbu missiyada kosmosga yuboriladi.
Izoh (0)