Tesla va SpaceX kompaniyalari asoschisi Ilon Mask Rossiyaning Kosmik faoliyat bo‘yicha davlat korporatsiyasi (“Roskosmos”) tomonidan ishlab chiqilayotgan “Amur-SPG” raketasi haqida o‘z fikrini bildirdi. Davlat korporatsiyasi raketaning birinchi pog‘onasi kamida 10 marta uchirilgandan so‘ng ham omon qolishiga umid qilmoqda, deb yozadi Forbes.
“Bu yaxshi usul, lekin men raketadan to‘liq qayta foydalanishga intilishni tavsiya qilaman”, — deb yozdi Mask Twitter’da, shuningdek, u izohlarda SpaceX’ning Falcon 9 eltuvchi raketalarida birinchi pog‘onadan qayta foydalanish sonining chegarasi yo‘qligi, ammo har safar uni qayta sozlash qiyinlashib borishi haqida qo‘shimcha qilgan.
Mart oyining o‘rtalarida Falcon 9 raketasining qayta foydalanish mumkin bo‘lgan birinchi pog‘onasi to‘qqizinchi marta platformaga muvaffaqiyatli qo‘ndi. Biroq uning dastlabki ikkita uchirilishi (2015-yil yanvar va aprel oylarida) muvaffaqiyatli yakunlanmasdan, qo‘nish paytida birinchi pog‘ona portlagan edi.
“Roskosmos” rahbari Dmitriy Rogozin 2019-yilda pog‘onalardan qayta foydalaniladigan metan bilan harakatlanuvchi raketa ustida ish boshlanganini e’lon qildi va uni “chiroyli qalam” deb atadi. “Soyuz-2” oilasiga kiruvchi barcha raketalarni yangi raketa bilan almashtirish rejalashtirilmoqda. “Bu pog‘onalari ikki yarim baravar kamroq bo‘lgan raketa, u arzonroq, shuningdek, qayta foydalaniladigan pog‘onalardan iborat bo‘ladi, biz bu ishni iloji boricha tezroq ochishni rejalashtirmoqdamiz”, — dedi Rogozin 2019-yilda.
2020-yil oktabr oyida “Roskosmos” “Amur-SPG” kosmik raketa kompleksini, xususan, metan bilan harakatlanadigan raketani dastlabki loyihalashtirish bo‘yicha “Progress” raketa-kosmik markazi bilan shartnoma imzoladi. Raketa Amur viloyatidagi Vostochniy kosmodromidan uchiriladi. Davlat korporatsiyasining rejalariga ko‘ra metan raketasi 2026-yilda birinchi parvozni amalga oshiradi.
Izoh (0)