Amerikaning SpaceX kompaniyasi Yer orbitasiga yana 52 ta Starlink internet sun’iy yo‘ldoshlarini chiqardi, deb yozadi “RBK”.
Bortiga sun’iy yo‘ldoshlar ortilgan Falcon 9 raketasi 9-avgust kuni 22:14 da (Toshkent vaqti bilan 10-avgust 7:14 da) Florida shtatidagi Kennedi kosmik markazi kosmodromidan uchirildi. Sal avvalroq start taxminan uch soatga kechiktirilgan edi.
Kompaniya muntazam ravishda Falcon 9 raketasida koinotga turli sun’iy yo‘ldoshlarni uchiradi. Chunonchi, fevral oyida Italiyaning COSMO-Skymed radiolokatsiya sun’iy yo‘ldoshi uchirilgandi. Shuningdek, SpaceX sayyorani asteroidlardan himoya qilish uchun zondlarni ham u orqali koinotga chiqargan.
Yil boshidan buyon SpaceX ko‘p marta bortiga o‘nlab sun’iy yo‘ldoshlar ortilgan Falcon 9 raketalarini koinotga yuborgan. Parvozlar 19-yanvarda, 2-aprelda, 6 va 14-mayda amalga oshirilgan.
SpaceX koinotga 2 mingdan ortiq Starlink sun’iy yo‘ldoshlarini chiqarishga ulgurgan, ammo ularning hammasi ham ishlamaydi yoki zarur orbitada emas. Yanvar o‘rtalarida SpaceX rahbari Ilon Mask koinotga uchirilgan sun’iy yo‘ldoshlarning faqat 1469 tasi faol ekanini, yana 272 tasi zarur orbitalarga qarab harakatlanayotganini aytgandi.
Starlink — global yuqori tezlikli internet bilan ta’minlash maqsadidagi sun’iy yo‘ldoshlar tizimini yaratish bo‘yicha loyiha. Sun’iy yo‘ldoshlar 550 km balandlikdagi orbitaga joylashtirilmoqda, 2020-yillar o‘rtalariga kelib, kompaniya bunday qurilmalardan 12 mingtasini orbitaga chiqarmoqchi.
Izoh (0)