Ijtimoiy tarmoqlarda Qoraqalpog‘istondagi to‘y marosimida chigirtkalar bosqini yuz bergani haqida videolar tarqaldi. O‘simliklar karantini va himoyasi agentligi buni rad etdi.
Ma’lum qilinishicha, Qoraqalpog‘iston Respublikasi Chigirtka va tut parvonasiga qarshi kurash xizmati xodimlari videoda aks etgan holat haqida 16-iyundan 17-iyunga o‘tar kechasi xabar topgan. Chigirtkalar to‘dasini bartaraf etish maqsadida To‘rtko‘l tumanida kuchaytirilgan monitoring olib borilgan, biroq manzil topilmagan. To‘rtko‘l tumani aholisidan ham chigirtkalar bosqini haqida murojaatlar kelib tushmagan.
Karantin agentligining Chigirtka va tut parvonasiga qarshi kurash xizmatlari hududiy bo‘limlari tomonidan barcha viloyatlarda kuchaytirilgan nazorat olib borilgan, biroq o‘rganishlar natijasida to‘yda chigirtkalar yopirilgan hudud aniqlanmagan.
Holatga oydinlik kiritish maqsadida qo‘shni davlatlar bilan telefon orqali axborot almashinilgan. Turkmanistonning O‘simliklarni himoya qilish xizmati direktori o‘rinbosari Xo‘jageldi Gujumov telefon muloqotida to‘y marosimi Lebop viloyatida o‘tkazilgani va yorug‘likka chigirtkalar to‘dasi yopirilganini ma’lum qilgan. Lebop viloyati O‘simliklarni himoya qilish bo‘limi rahbari Arslan Durdigilijov ma’lumotni tasdiqlagan va hududda kimyoviy ishlov olib borilganini bildirgan.
Agentlik matbuot xizmatining ma’lum qilishicha, tasvirdagi chigirtkalar saksovul bukri chigirtkasi bo‘lib, O‘zbekistonda asosan Qoraqalpog‘iston Respublikasi, Xorazm, Buxoro va Navoiy viloyatlarida uchraydi. 18-iyun holatiga ko‘ra, respublikada 869,6 ming gektar maydonda kuzatuv-nazorat ishlari olib borilib, 503,2 ming gektar maydonda kimyoviy kurash tadbirlari o‘tkazildi.
Qozog‘iston, O‘zbekiston va Qirg‘iziston chigirtkalarga qarshi kurashish bo‘yicha kuchlarni birlashtirib, mintaqaviy xavfsizlikni ta’minlash yo‘lida hamkorlikni yo‘lga qo‘ymoqda.
O‘zbekistonda 2025-yilda 608 ming gektar maydonda chigirtka tarqalishi prognoz qilingan. Biroq iqlim o‘zgarishi, yil sayin havo haroratining oshib borayotgani zararli chigirtkalar maydoni kengayishiga olib kelishi mumkin. Chigirtka bosqini bilan bog‘liq barcha murojaatlarni o‘z vaqtida bartaraf etish maqsadida hududlarda tezkor shtablar tashkil etilib, chigirtka xizmati 24/7 rejimiga o‘tkazilgan.
Izoh (0)