Buxoro viloyatining Romitan tumanida chigirtkalar bosqini kuzatilgani aholi o‘rtasida sarosimaga sabab bo‘lgandi. O‘simliklar karantini va himoyasi agentligi matbuot kotibi Sabina Sadinova holat bartaraf etilganini ma’lum qildi.
-CvvIUbf8.jpg)
Bir necha kun avval Qozog‘iston hududida misli ko‘rilmagan darajada zararli chigirtkalar tarqalgani haqida xabarlar eʼlon qilingan edi. Sabina Sadinovaning bildirishicha, vaziyat O‘zbekiston hududida favqulodda holat tusini olmasligi uchun qo‘shni davlat bilan transchegaraviy hududlarda, xususan, Navoiy Toshkent viloyatlari hamda Qoraqalpog‘iston Respublikasida nazorat kuchaytirildi.
“Chigirtkalar xavfini bartaraf etish maqsadida BMTning FAO dasturi doirasida qo‘shni davlatlarda tizimli ish tashkil qilish taklifi aynan agentlik tomonidan ilgari surilgan edi. Shuningdek, zararli chigirtkalar tarqalishi xavfi yuqori bo‘lgan Turkmaniston bilan transchegaraviy hududlar — Buxoro va xorazm viloyatlarida ham nazorat kuchaytirildi. Monitoring jarayonida Buxoro viloyatining Romitan, Qorako‘l, Olot va Jondor tumanlarida chigirtka tarqalgani aniqlangan bo‘lib, o‘sha kunning o‘zida kimyoviy ishlov olib borildi”, — deydi agentlik matbuot kotibi.
Hozirda Buxoro viloyati Romitan tumanining Gazli massivida zararli hasharot tarqalishi xavfi bartaraf etilgan.
Sabina Sadinovaning ma’lum qilishicha, bugungi kunga qadar Buxoro viloyatida 12 321 gektar maydonda kimyoviy kurash tadbirlari olib borilgan. Shuningdek, qo‘shni Xorazm viloyatida o‘choqlarini oldini olish maqsadida 3 272 gektarda kimyoviy ishlov o‘tkazildi. Zararli chigirtkalarga qarshi kurash mavsumini betalofat o‘tkazish uchun moddiy texnik baza yaratilgan bo‘lib, yoqilg‘i kimyoviy vositalar zaxirasi jamg‘arilgan.
“Shu o‘rinda ta’kidlab o‘tmoqchimiz sarosimaga o‘rin yo‘q vaziyat nazorat ostida”, — deydi O‘simliklar karantini va himoyasi agentligi matbuot kotibi.
FVV matbuot xizmati bergan axborotga ko‘ra, bahor-yoz mavsumida respublika hududlarida vazirlik rahbarligida tegishli tashkilotlar bilan hamkorlikda zararli chigirtkaga qarshi kurashish ishlari har yili tizimli ravishda amalga oshiriladi. Xususan, mavsum boshlanishidan oldin hasharotlar tarqalish imkoni mavjud bo‘lgan joylar aniqlanib, maxsus texnikalar yordamida kimyoviy ishlovlar amalga oshirilib kelinmoqda.
Ayni kunlarda bunday ishlar Surxondaryo, Qashqadaryo, Buxoro, Jizzax, Toshkent, Namangan viloyatlarida olib borilmoqda.
Izoh (0)