Zararli chigirtkalar ko‘p tarqalgan Qashqadaryo, Surxondaryo, Jizzax, Navoiy, Toshkent viloyatlari va Qoraqolpog‘iston Respublikasida kimyoviy kurash ishlari davom etmoqda. Bu haqda O‘simliklar karantini va himoyasi agentligi ma’lum qildi.
Ma’lum qilinishicha, 2022-yilda respublika bo‘yicha zararli chigirtkalar tarqalishi mumkin bo‘lgan 580,3 ming gektardan ortiq maydonda kimyoviy ishlov o‘tkazilishi rejalashtirilgan. Bugungi kungacha mamlakat hududida 292,6 ming gektar maydonda chigirtkalar tarqalganligi aniqlangan. 284 ming gektar maydonda kimyoviy ishlovlar o‘tkazilgan.
“Bunday jarayonlar Qashqadaryo, Surxondaryo, Jizzax, Qoraqalpog‘iston Respublikasi, Samarqand, Navoiy, Sirdaryo, Buxoro, Andijon, Xorazm, Namangan, Farg‘ona viloyatlari hududida kimyoviy ishlovlar o‘tkazildi. Eng katta ishlov berilgan maydonlar hududi Qashqadaryo, Surxondaryo, Jizzax viloyatlari hamda Qoraqolpog‘iston Respublikasiga to‘g‘ri keladi”, — deyiladi xabarda.
Ta’kidlanishicha, zararli chigirtkalarning qo‘shni respublikalardan uchib o‘tish xavfi ham mavjud. Shuni inobatga olgan holda
- 28-mart va 2-aprel kunlari O‘zbekiston O‘simliklarni karantini va himoyasi agentligi hamda Tojikiston Chigirtkalarga qarshi kurash bo‘yicha davlat unitar korxonasi olim va mutaxassislari tomonidan Tojikistonning Rudakiy, Shaxritus, Nosiri Hisrav tumanlarining chegara hududlarida va O‘zbekistonning Uzun, Jarqo‘rg‘on, Qumqo‘rg‘on, Sho‘rchi va Termiz tumanlarida;
- 26—27-may kunlari Turkiston viloyatining Keles, Sariyog‘och, Qazigurt tumanlarida;
- 31-may-3-iyun kunlari O‘zbekiston va Tojikiston ishchi guruhlari tomonidan So‘g‘d viloyatining Istaravshon, Zafarobod va Shaxriston tumanlarining chegaradosh hududlarida va Jizzax viloyatining Yangiobod, Zomin tumanlarida zararli chigirtkalarni tarqalishini oldini olish maqsadida hamkorlikda kuzatuvlar olib borilgan. Shuningdek, qo‘shni mamlakatlarning fitosanitar xxizmatlari bilan monitoringni davom ettirish va natijalar yuzasidan axborot almashinuvini olib borishga kelishib olingan.
Avvalroq ijtimoiy tarmoqlarda Qashqadaryo viloyatining Dehqonobod tumanidagi ekin maydonlarini chigirtka to‘dasi bosgani aytilgan video tarqalgandi. Keyinroq tuman hokimligi holatga munosabat bildirib, Turkmanistondan kirib kelgan chigirtkalar qishloq xo‘jaligiga zarar yetkazmasligini ma’lum qilgan edi.
Izoh (0)