Qozog‘istonning Turkiston viloyatida chigirtkalarga qarshi kurashga 70 ta texnika, to‘rtta samolyot jalb qilindi. Bu haqda viloyat hokimligiga tayanib, Tengrinews xabar berdi.
Qarshi kurash choralari 70 ta quruqlik texnikasi hamda 4 ta qo‘shimcha samolyot yordamida amalga oshirilmoqda, ayni paytda sabzavot va poliz ekinlari atrofiga barcha zarur texnikalar jamlangan. Bugungi kunga qadar ekinlarga zarar yetmagan, — deyiladi xabarda.
Viloyatda tozalangan 260 ming gektardan tashqari 50 ming gektardan ortiq maydonlarda chigirtkalar o‘chog‘i qayd etilgan. Turkiston viloyatining Aris shahri, Sariog‘ash, Keles, O‘rdabasin va Shardara tumanlarida qo‘shimcha qarshi kurash choralari olib borilmoqda.
Bosh vazir o‘rinbosari Serik Jumangarin 8-iyun kuni chigirtkalar tarqalishiga qarshi kurashish bo‘yicha markaziy tezkor shtab yig‘ilishida mamlakatdagi chigirtkalar bilan bog‘liq vaziyatni quyidagicha ta’rifladi:
Biz hech qachon bu yilgidek katta miqdorda chigirtka bosqiniga duch kelmaganmiz va uning tarqalishi ehtimoli oqibatlarini yetarlicha baholamayapmiz. Qishloq xo‘jaligi davlat inspeksiyasi qo‘mitasiga barcha protsessual masalalarni tezda yakunlash va zarur bo‘lgan texnikani zarur hududlarga yuborish vazifasini topshiraman, — degan u.
Buxoroga ham chigirtkalar hujum qildi
Buxoro viloyatining Romitan tumanida bir necha kundan buyon chigirtkalar bosqini kuzatilmoqda. Romitan tumanidan kesib o‘tuvchi A-380 Buxoro—Xorazm avtomobil yo‘lining Gazli shaharchasiga yaqin qismida zararkunandalar ko‘paygani aks etgan videolar ijtimoiy tarmoqlarda tarqaldi. Rasmiylar qishloq xo‘jaligi va infratuzilmaga zarar yetkazmasligi uchun chigirtkalarga qarshi kurash choralarini ko‘rmoqda. Toshkent viloyatiga qo‘shni Qozog‘istonning janubiy viloyati Turkistonda chigirtkalar to‘dalari haddan tashqari ko‘paygan.
Izoh (0)