Buxoro va Xorazm viloyatlarini bog‘lovchi A-380 avtomobil yo‘lini chigirtkalar bosgani aks etgan videolar tarqaldi. O‘simlik karantini va himoyasi agentligi bu saksovul bukri chigirtkasi to‘dasi ekanini ma’lum qildi.
Agentlik bergan ma’lumotga ko‘ra, videoda aks etgan holat Buxoro viloyatining A-380 avtomobil yo‘lining 327-kilometrida kuzatilgan. Chigirtkalar to‘dasini o‘z vaqtida talafotlarsiz bartaraf etish maqsadida Buxoro viloyatining chigirtka va tut parvonasiga qarshi kurash xizmati ikkita otryadga bo‘lingan holda kimyoviy ishlovlarni 24/7 rejimida olib bormoqda.
“Alohida qayd etib o‘tamiz, saksovul bukri chigirtkasi qishloq xo‘jaligi ekinlariga zarar yetkazmaydi”, deyiladi xabarda.
Qayd etilishicha, Buxoro viloyatining Gazli massivi, Romiton, Qorako‘l, Toyloq tumanlari alohida nazoratga olingan bo‘lib, kuzatuv-monitoring ishlari ham davom etmoqda. Respublika bo‘yicha zararli chigirtka bilan bog‘liq vaziyat nazorat ostida bo‘lib, 10-may holatiga ko‘ra, 472 ming 739 gektar maydonda kuzatuv olib borildi. Monitoring natijasida 267 ming 267 gektar maydonda zararli chigirtka tarqalgani aniqlandi. Shundan 244 ming 530 gektarda kimyoviy ishlovlar o‘tkazildi. Jumladan, Buxoro viloyatida 4509 gektar maydonda kimyoviy ishlovlar o‘tkazildi.
-0YoSykKU.avif)
FVV matbuot xizmati xabariga ko‘ra, Buxoro viloyatining bir nechta hududlarida zararli chigirtkalar tarqalgani bo‘yicha viloyat FVBga xabar kelib tushgan. Xabarga ko‘ra, viloyat FVB, O‘simliklar karantini va himoyasi agentligi hamda boshqa hamkor tashkilotlar voqea joyiga yetib borib, ular tomonidan ushbu hududlarda 15 ta maxsus texnika yordamida kimyoviy ishlovlar berilgan. Hozirda viloyat hududida zararli chigirtkalar bilan bog‘liq vaziyat to‘liq nazoratga olingan.
Kuzgi va bahorgi kuzatuvlar natijasida 2025-yilda 608 ming gektar maydonda chigirtka tarqalishi prognoz qilingan. Biroq iqlim o‘zgarishi, yil sayin havo haroratining oshib borayotgani zararli chigirtkalar maydoni kengayishiga olib kelishi mumkin.
Zararli chigirtkagaqarshi kurash tizimi takomillashtirilib, monitoring va ishlov berilgan maydonlar hududlarida “Lokust.uz” platformasiga kiritilib, elektron xaritalar ham shakllantirilmoqda.
Chigirtka bosqini bilan bog‘liq barcha murojaatlarni o‘z vaqtida bartaraf etish maqsadida hududlarda tezkor shtablar tashkil etilib, chigirtka xizmati 24/7 rejimiga o‘tkazilgan. Fuqarolar zararli chigirtka tarqalgan hudud haqida 1288 yoki 71 202 10 00 raqamlari orqali xabar berishi mumkin. Xizmatlar va kimyoviy vositalar mutlaqo bepul.
Izoh (0)