Baʼzi aktyorlarning qondosh ekanini, hattoki, tasavvur ham qilmagansiz. Bundan tashqari, bir inson deb o‘ylagan aktyorimizning aslida egizagi borligini ham ko‘pchilik bilmasa kerak.
Botir Zokirovning ukasi Farrux Zokirov
Botir va Farrux Zokirov — mashhur aka-uka sanʼatkorlar bo‘lib, sanʼatkorlar oilasida tug‘ilgan. Otasi opera xonandasi Karim Zokirov, onasi musiqachi Shohista Saidova edi. Botir Zokirov o‘zbek estrada sanʼatining asoschisi, ko‘p tillarda kuylagan va xalqaro sahnalarda tanilgan xonanda edi.Xonanda Parijdagi mashhur “Olimpia” sahnasida chiqish qilgan ilk o‘zbek sanʼatkoridir. U 48 yoshida saratondan vafot etgan. Milliy estrada sanʼati instituti va estrada simfonik orkestri Botir Zokirov nomi bilan ataladi, Toshkentda haykali o‘rnatilgan.
Farrux Zokirov “Yalla” ansamblining rahbari, taniqli bastakor va estrada xonandasi bo‘lib, ko‘plab davlatlarning xalq artisti unvoniga sazovor bo‘lgan. U “Buyuk xizmatlari uchun” va “El-yurt hurmati” ordenlari bilan taqdirlangan. Aka-ukalar o‘zbek sanʼatini boshqa millat vakillariga ham tanitgan ijodkorlardir.
Iskandar Hamroqulovning ukasi Samandar Hamroqulov
Iskandar va Samandar Hamroqulovlar — mashhur aka-uka sanʼatkorlar, sanʼatkorlar oilasida tug‘ilgan. Otasi Rustamali Hamroqulov O‘zbekiston xalq artisti edi. Iskandar aktyor va qiziqchi sifatida tanilgan, satirik chiqishlari bilan mashhur.
Samandar esa aktyor va boshlovchi. U 2007-yilda “O‘zbekiston xizmat ko‘rsatgan artist” unvonini olgan.
Obid Yunusovning ukasi Hasan Yunusov
Obid Yunusov va Hasan Rajabiy aka-uka bo‘lib, ular Rajabiylar sulolasining mashhur vakillaridir. Ularning otasi Yunus Rajabiy taniqli musiqachi va bastakor edi. Obid Yunusov “O‘zbekiston xalq artisti” unvoniga ega bo‘lgan, teatr va kinoda ko‘plab rollarni ijro etgan. U 2015-yilda vafot etgan.
Hasan Rajabiy esa maqom xonandasi, sozanda va bastakor, “O‘zbekiston xalq hofizi” unvoni sohibi. Aka-ukalar o‘zbek sanʼatida chuqur iz qoldirgan ijodkorlardir.
Alisher Fayzning ukasi Xurshid Turdiyev
Alisher Fayz va Xurshid Turdiyev — aka-uka sanʼatkorlar bo‘lib, Namangan viloyatida tug‘ilgan. “Rashk qilasanmi”, “Baxtlimisan ayt”, “Asal onam” kabi qo‘shiqlari muxlislar qalbidan joy egallagan xonanda 2012-yilda “O‘zbekistonda xizmat ko‘rsatgan artist” unvonini olgan.
Ukasi Xurshid Turdiyev ham xonanda va bastakor sifatida faoliyat yuritadi.
Xayrulla Saʼdiyev Yodgor Saʼdiyevning akasi
Xayrulla va Yodgor Saʼdiyevlar — taniqli aka-uka aktyorlar bo‘lib, mashhur aktyor Habib Saʼdiyevning farzandlari. O‘zbekiston xalq artisti Xayrulla Saʼdiyev teatr va kino aktyori, dublyaj ustasi.
Akasidan olti yosh kichik Yodgor Saʼdiyev ham aktyor va rejissyor. U xalq orasida “Shaytanat”dagi Asadbek roli bilan mashhur. Aktyorlar “Shaytanat” serialida birgalikda rol ijro etgan. Serial ularning birgalikdagi qatnashgan eng mashhur loyihalardan biri.
Anvar Sobirov esa Og‘abek Sobirovning ukasi
Anvar va Og‘abek Sobirovlar xorazmlik mashhur aka-uka xonandalar. Og‘abek Sobirov bastakor va estrada xonandasi bo‘lib, “O‘zbekiston xalq artisti” unvoniga ega bo‘lgan.
Ukasi Anvar Sobirov esa “Begona bahor” filmidagi rolidan so‘ng muxlislar eʼtiboriga tushgan.
Muhriddin Xoliqovning ukasi Husniddin Xoliqov
Namanganlik aka-uka Muhriddin va Husniddin Xoliqovlar sanʼatkor oilasida ulg‘aygan. Otasi hofiz, onasi shoira bo‘lgan. Muhriddin Xoliqovning “Nargiz”, “Pariro‘y sanamlar”, “Bugun seni uzatamiz” qo‘shiqlari hanuzgacha sevib tinglanadi. U 2001-yilda avtohalokatda vafot etgan.
Ukasi Husniddin Xoliqov ham xonanda va bastakor sifatida faoliyat yuritgan, 2005-yilda kasallikdan vafot etgan. Hozirda uning qizi model, instabloger Farangiz Xoliqova otasining qo‘shiqlarini boshqa sanʼatkorlar kuylashini taqiqlab qo‘ygan.
Oybek Xolmedovning ukasi Ulug‘bek Xolmedov
Oybek va Ulug‘bek Xolmedovlar — taniqli aka-uka sanʼatkorlar bo‘lib, ijodiy muhitda ulg‘aygan. Otasi Mirzabek Xolmedov so‘z ustasi va qiziqchi. Oybek xonanda va bastakor sifatida faoliyat yuritadi, mashhur qo‘shiqlar muallifi.
Ulug‘bek esa xonanda va shoumen bo‘lib, o‘zining konsert dasturlari bilan tanilgan.
Sobit Asomovning ukasi Obid Asomov
Sobit va Obid Asomovlar — o‘zbek sanʼatining taniqli marhum aka-uka qiziqchilari. Sobit Asomov aktyor sifatida sahnalarda faol bo‘lib, 1996-yilda sahnada yurak xurujidan vafot etgan.
Obid Asomov esa aktyor, va hajviy guruh rahbari bo‘lib, 1989-yilda “Obid-A” hajviy guruhini tashkil qilgan. U televideniye va kinoda faoliyat yuritgan, Rossiya teleshoularida ishtirok etgan. Qiziqchi 2018-yilda yurak xurujidan Toshkentda vafot etgan.
Behzod Muhammadkarimovning ukasi Ulug‘bek Muhammadkarimov
Behzod va Ulug‘bek Muhammadkarimovlar — o‘zbek teatr va kino sohasining taniqli aka-uka sanʼatkorlari. Behzod Muhammadkarimov 1988-yildan buyon O‘zbek Milliy akademik drama teatrida faoliyat yuritib, “Buyuk Amir Temur”, “O‘tkan kunlar” va “Shaytanat” kabi filmlarda bosh rollarni ijro etgan. Hozirgi kunda esa dublyaj sohasida ham faoliyat yuritadi.
Ulug‘bek Muhammadkarimov ham kino va teatrda faol bo‘lib, “Jasur” va “Shovqin” kabi filmlarda rol ijro etgan. U haqida maʼlumotlar nisbatan kamroq bo‘lsa-da, aktyor sanʼat sohasida o‘z o‘rniga ega.
Botir Muhammadxo‘jayevning ukasi O‘tkir Muhammadxo‘jayev
Botir va O‘tkir Muhammadxo‘jayevlar ham o‘zbek sanʼatidagi mashhur aka-ukalardan. Botir Muhammadxo‘jayev aktyor sifatida tanilgan. Uning “Sevginator” va “ Tog‘lik kuyov” filmlaridagi rollari mashhur.
O‘tkir Muhammadxo‘jayev esa 1990-yillardan beri so‘z ustasi va shoumen.
Shohruxxon Yo‘ldoshevning ukasi Muhammadali Navro‘zov
Shohruxxon va Muhammadali Navro‘zovlar — o‘zbek shou-biznesida taniqli aka-ukalar bo‘lib, xonandalik va aktyorlik sohasida faoliyat yuritadi. Shohruxxon 1985-yilda tug‘ilgan. Onasi rejissyor Zebo Navro‘zovaning “Bo‘rilar” filmidagi bosh roli unga mashhurlik olib kelgan. 2008-yilda “Nihol” mukofoti bilan taqdirlangan.
Muhammadali Navro‘zov 1991-yilda tug‘ilgan. U ham aktyor rejissyor. Muhammadali komediya janridagi filmlarni suratga oladi.
Zuhriddin Rejametovning ukasi Husan Rejametov
Zuhriddin va Husan Rejametovlar Tugan Rejametov oilasida tug‘ilgan. Ikkalasi ham O‘zbekiston Davlat Satira teatrining aktyorlaridir. Zuhriddin Rejametovning ishtirokidagi “Mardikor ayol”, “Taʼziyadagi to‘y” va “Shunqorlar” kabi filmlar xalq ichida mashhur.
Husan Rejametov haqida maʼlumotlar ko‘p bo‘lmasa-da, u 1970-yilda tug‘ilgan bo‘lib, “Sarvinoz”, “Zanjir”, “Ko‘chaning quyoshli tomonida” filmlarida rol ijro etgan. Aktrisa Fotima Rejametova ham ularning qondoshi.
Hasan va Husan Maqsudovlar
Hasan va Husan Maqsudovlar mashhur aka-ukalar bo‘lib, aktyorlik faoliyati bilan tanilgan. Ular bir nechta loyihalarda bir-birining o‘rnida rol o‘ynagan. Tomoshabinlar ko‘pincha ularni bir inson deb o‘ylaydi.
Umid Iskandarovning ukasi Muhammadali Iskandarov
Umid va Muhammadali Iskandarovlar — o‘zbek kinosidagi taniqli aka-ukalar. Umid aktyor va rejissyor bo‘lib, “Lafz”, “Hamroh”, “Oqibat” kabi filmlarda rol ijro etgan.
Muhammadali esa rejissyor, aktyor va prodyuser sifatida “Men terrorchi emasman” filmi bilan tanilgan. Aka-uka birgalikda “O‘yin ichida o‘yin” filmida rol ijro etishgan. Ularning otasi Qurbonali Maqsudxonzoda Iskandariy — aktyor va rejissyor, onasi Sanoatxon Iskandarova — sanʼatkor. Sanʼatga mehr ular uchun oilaviy meros bo‘lgan.
Elyor Mahkamov Diyor Mahkamovning ukasi
Diyor va Elyor Mahkamovlarning aka-ukaligini ham ko‘pchilik bilmaydi. Diyor estrada xonandasi, aktyor va prodyuser bo‘lib, muhabbat mavzusidagi qo‘shiqlari, undan tashqari “Muhabbat sinovlari”, “Majnun” va “Virus” kabi filmlardagi rollari bilan mashhur.
Elyor esa asosan aktyor sifatida tanilgan, “Majnun” hamda “Temur” filmlarida rol o‘ynagan. Ularning sanʼatga bo‘lgan qiziqishi otasi Doniyor Mahkamov va onasi Mahfuza Mahkamova tufayli yuzaga kelgan.
Izoh (0)