Ijtimoiy tarmoqlarda Moskvada hujjatlarida muammosi bor muhojirlarga nisbatan noinsoniy munosabatda bo‘layotgani aytilgan xabarlar tarqaldi. Migratsiya agentligining Rossiyadagi vakolatxonasi holat yuzasidan ma’lumot berdi.
Qayd etilishicha, 8-iyun kuni Moskva shahri Sokolniki tumanida o‘tkazilgan tekshiruv tadbirlari chog‘ida Rossiya Federatsiyasi huquqni muhofaza qiluvchi organlari (OMON) tomonidan ushbu davlatda vaqtincha mehnat faoliyatini olib borayotgan xorij fuqarolariga nisbatan jismoniy kuch qo‘llangani aks etgan xabarlar keng muhokama qilinmoqda.
Ayni paytda mazkur holat yuzasidan Rossiya federatsiyasining huquqni muhofaza qiluvchi organlaridan rasmiy ma’lumot kutilmoqda. O‘zbekistonning Moskva shahridagi Bosh konsulxonasi va Migratsiya agentligining Rossiya Federatsiyasidagi vakolatxonasi ushbu masalani nazoratga olgan.
Ma’lumotlarga ko‘ra, reyd yakunida hujjatlarida muammo aniqlangan 5–6 nafar shaxs ushlab qolinib, holatni aniqlash maqsadida ichki ishlar bo‘limiga olib ketilgan.
Agar ushbu vaziyatda jabrlanganlar orasida O‘zbekiston fuqarolari mavjud bo‘lsa, jumladan, ularga tan jarohatlari yetkazilgan, huquqlari buzilgan yoki boshqa muammolarga duch kelgan bo‘lsalar, holat yuzasidan Migratsiya agentligining Rossiya Federatsiyasidagi vakolatxonasiga quyidagi aloqa raqamlari orqali murojaat qilishlari so‘raldi:
Telefon: +7 925 045-47-44
Izoh (0)