Moskvada noqonuniy migratsiyaga qarshi kurash bo‘yicha o‘tkazilgan reyd davomida politsiya 6 mingdan ortiq qoidabuzarliklarni aniqlab, 836 nafar noqonuniy migrantni Rossiyadan chiqarib yuborishga qaror qildi. Bu haqda mamlakat Ichki ishlar vazirligi xabar berdi.
Reyd davomida xavfsizlik kuchlari tomonidan uy-joy sektori, ulgurji va chakana savdo, umumiy ovqatlanish shoxobchalari, qurilish va boshqa obyektlardagi 10 mingdan ortiq obyekt ko‘zdan kechirilgan. Natijada 6 mingdan ortiq migratsiya qonunchiligi buzilishi aniqlanib, Rossiyada bo‘lish, mamlakatga kirish qoidalarini buzish, noqonuniy mehnat faoliyatini amalga oshirish bo‘yicha 4,5 mingdan ortiq bayonnomalar tuzilgan.
“Rossiya Federatsiyasi Maʼmuriy javobgarlik to‘g‘risidagi kodeksining 18,15-moddasiga asosan 502 nafar ish beruvchi javobgarlikka tortildi. Davom etayotgan tadbir doirasida IIB xodimlari tomonidan qidiruvda bo‘lgan 22 nafar shaxs aniqlandi. 836 nafar chet el fuqarosini Rossiyadan maʼmuriy chiqarib yuborish to‘g‘risida qaror qabul qilindi”, — deyiladi IIV xabarida.
Shuningdek, noqonuniy migratsiyani tashkil etish bo‘yicha 192 ta jinoiy ish qo‘zg‘atilgan. Shundan 14 tasi Jinoyat kodeksining 322,1-moddasi (noqonuniy migratsiyani tashkil etish), 110 tasi migrantlarni soxta ro‘yxatga olish va hisobga qo‘yish, 68 tasi hujjatlarni qalbakilashtirish bilan bog‘liq.
Rossiyada noqonuniy muhojirlarga qarshi reydlar Crocus City Hall’da uyushtirilgan teraktda Tojikiston fuqarolari ayblanayotgandan keyin kuchaygan. So‘nggi maʼlumotlarga ko‘ra, Crocus’dagi teraktda 145 kishi halok bo‘lgan, 550 dan ortiq kishi jarohatlangan, javobgarlikni ISHID terrorchilik tashkiloti o‘z zimmasiga olgan.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)