Rossiyada 15 nafar o‘zbekiston fuqarosi noqonuniy ushlab turilgani haqida xabarlar tarqalgandi. O‘zbekistonning Rossiyadagi elchixonasi holat yuzasidan rasmiy ma’lumot berdi.
Tarqalgan xabarda Rossiya Ichki ishlar vazirligining Odintsova shahar okrugidagi 5-politsiya bo‘limida 15 nafar O‘zbekiston fuqarosi to‘rt kundan ortiq vaqt davomida noqonuniy ushlab turilgani aytilgan. Vaziyatga aniqlik kiritish maqsadida 8-avgustda elchixonasi konsullik bo‘limi xodimlari Moskva viloyati Odintsova shahar okrugidagi bo‘limiga tashrif buyurgan.
Uchrashuv davomida politsiya bo‘limida 15 nafar O‘zbekiston fuqarosi borligi, ular Rossiya ichki ishlar boshqarmasi xodimlari tomonidan Odintsova shahar okrugida o‘tkazilgan reyd natijasida hibsga olingani aniqlandi.
Yuqorida qayd etilgan O‘zbekiston fuqarolari Moskva viloyati hududida tegishli ruxsatnomalarni rasmiylashtirmasdan mehnat faoliyatini noqonuniy ravishda olib borgan.
9-avgust kuni ushbu fuqarolar Rossiyadan chiqarib yuborish uchun mamlakat ichki ishlar vazirligining Moskva viloyati bosh boshqarmasi chet el fuqarolarini vaqtincha saqlash markaziga joylashtirilgan.
O‘zbekistonning Rossiyadagi elchixonasi ushbu davlatga kelishni rejalashtirayotganlardan, shuningdek, mehnat migratsiyasi bo‘yicha Rossiyada bo‘lgan fuqarolardan qabul qiluvchi mamlakatda belgilangan qonun hujjatlariga rioya qilishlarini so‘radi.
Rossiyada o‘zbekistonlik mehnat migrantlari soni keskin kamaygan. Statistik ma’lumotlarga qaraganda, Rossiyada 2016-yilgacha o‘rtacha 4 milliondan ortiq, hatto 6 millionga yaqin muhojir mehnat qilar edi. 2024-yil iyun oyida bu ko‘rsatkich 1 million kishini tashkil qilgan. O‘zbekistonga qaytgan fuqarolarni ishga joylashtirish yuzasidan topshiriqlar berilgan.
Izoh (0)