Rossiyaning Leningrad viloyatida 1-iyun kuni o‘zbekistonlik quruvchining boshiga sement to‘ldirilgan chelak tashlab yuborildi. O‘zbekiston fuqarosi olgan jarohati sababli vafot etdi. Bu haqda 78.ru xabar berdi.
Hodisa Vsevolojsk tumani “Nevskaya dolina” ko‘p qavatli uyi qurilishida sodir bo‘lgan. Politsiyaga ishchining boshiga g‘isht tushgani haqida xabar kelib tushgan. Voqea guvohi bo‘lgan qo‘riqchi 34 yoshli O‘zbekiston fuqarosi boshiga sement qorishmasi qoldiqlari bo‘lgan metall chelak tushganini aytgan. Shundan so‘ng o‘zbekistonlik erkak tan jarohatlari bilan shifoxonaga olib ketilgan.
Videokuzatuv kameralariga soat 11:47 da noma’lum shaxs qurilayotgan uyning oltinchi qavatidagi derazadan qaragani, keyin qo‘lini chiqarib, ehtimol, chelakni pastga tashlagani aks etgan. O‘zbekiston fuqarosi bir necha soatdan so‘ng shifoxonada vafot etgan.
Leningrad viloyati Tergov qo‘mitasiga ko‘ra, xavfsizlik qoidalarini buzish holati bo‘yicha jinoiy ish qo‘zg‘atilgan.
Hozirda voqea tafsilotlari, shuningdek, uning sabab va sharoitlarini aniqlashga qaratilgan tergov harakatlari olib borilmoqda, deyiladi idora xabarida.
Tergov davomida qurilish jarayonining xavfsizligini ta’minlash vazifasi yuklatilgan xodimlar aniqlanadi.
Izoh (0)