Rossiyaning Voronej shahridagi qurilishda 45 nafar O‘zbekiston fuqarosi qo‘lga olingani haqida xabar berilgan edi. O‘zbekiston Tashqi mehnat migratsiyasi agentligi holat yuzasidan ma’lumot berdi.
Voronej politsiyasi tarqatgan videoda miltiq bilan qurollangan xavfsizlik kuchlari migrantlar guruhini saf tortgan holda olib kelayotgani ask etgandi.
Maʼlum bo‘lishicha, videoda aks etgan holat 7-iyun kuni Voronej shahridagi “Razvitiye” qurilish hududida yuz bergan. Reyd tadbiri o‘tkazilgan ushbu qurilish hududida 45 nafar O‘zbekiston fuqarosi mehnat faoliyatini amalga oshirayotgan bo‘lib, ularning 12 nafari norasmiy ishlagan.
Norasmiy ishlaganlarning 11 nafariga nisbatan patent muddati o‘tib ketgani sababli jarima shaklida maʼmuriy javobgarlik qo‘llanilib, shu kunning o‘zida vaqtincha yashash joyiga ruxsat berilgan va yana bir nafari esa hech qanday hujjatlarsiz ishlagani sababli hozirda mamlakat hududidan deportatsiya qilinmoqda.
“Shu o‘rinda, Rossiyada vaqtincha mehnat faoliyatini amalga oshirayotgan yurtdoshlarimizdan mahalliy qonun-qoidalarga rioya qilish hamda migratsiya qonunchiligini buzmaslik so‘raladi”, — deyiladi agentlik xabarida.
Iyun oyi boshlarida e’lon qilingan ma’lumotga ko‘ra, Rossiyadagi o‘zbekistonlik mehnat migrantlari soni 1 million kishini tashkil etmoqda. Tashqi mehnat migratsiyasi agentligi bo‘lim boshlig‘i Alisher Ro‘ziyevning so‘zlariga ko‘ra, O‘zbekistondan Rossiyaga mehnat migrantlari oqimi yana kamayishi mumkin.
Izoh (0)