Yaponiyada joriy etilayotgan qat’iy qoidalar ish beruvchilarni xodimlarini ekstremal haroratdan yetarli darajada himoya qilmaganligi uchun jarimaga tortishga olib keladi. Bu haqda The Japan Times xabar bermoqda.
Ma’lum qilinishicha, 1-iyundan kuchga kirgan yangi tahrirdagi qonun jazirama sharoitida ishchilar xavfsizligini ta’minlash bo‘yicha milliy darajadagi siyosatning dunyoda kamdan-kam uchraydigan namunasi hisoblanadi.
Yaponiya Sog‘liqni saqlash vazirligi ma’lumotlariga ko‘ra, o‘tgan yili ishlab chiqarishdagi yuqori harorat tufayli 30 kishi halok bo‘lgan va 1200 ga yaqin kishi jarohat olgan. Jabrlanganlarning aksariyati qurilish yoki ishlab chiqarish sohalarida ishlagan.
Vazirlik bayonotida aytilishicha, hukumat o‘tgan yozda, iyul oyida tarixdagi eng yuqori harorat qayd etilgan jazirama issiqdan so‘ng, himoyani kuchaytirish choralarini ko‘rgan. Agar himoya choralari yetarli bo‘lmasa, korxonalarga 500 ming iyena (3475 dollar) miqdorida jarima solish ko‘zda tutilgan.
Jahon sog‘liqni saqlash tashkilotining o‘tgan yilgi hisobotiga ko‘ra, 2000-2019-yillar oralig‘ida har yili issiqlik urishidan yarim millionga yaqin o‘lim holati qayd etilgan.
Aholi salomatligiga ta’siri bilan bir qatorda, haroratning ko‘tarilishi mehnat unumdorligiga ta’sir qilishi mumkin va issiqlik to‘lqinlari keltirib chiqaradigan iqtisodiy zarar tobora ko‘proq tashvish uyg‘otmoqda.
Yaponiya qonunchiligi ish beruvchilardan issiqlik urishi alomatlarini tezda aniqlash va ishchilarga yordam ko‘rsatish imkonini beruvchi protokollarni joriy etishni talab qiladi. Siyosatchilar kompaniyalarni ish joylarida hamkorlik tizimini qo‘llashga, xodimlarni kuzatish uchun taqiladigan qurilmalarni tarqatishga va kasalxonalar yoki klinikalarga shoshilinch tashishni ta’minlashga undamoqda.
Ish beruvchilar harorat va namlik kabi omillarni hisobga olgan holda to‘g‘ridan-to‘g‘ri quyosh nuri ostida issiqlik stressini ko‘rsatuvchi Wet Bulb Globe Temperature indeksini kuzatib borishlari tavsiya etiladi. Indeks qiymati bir soatdan ortiq yoki kun davomida jami to‘rt va undan ko‘p soat mobaynida 28°C dan yoki havo harorati 31°C dan yuqori bo‘lgan ish joylarida maxsus choralar ko‘rish talab etiladi.
Izoh (0)