O‘zbekiston qonunchiligida 2025-yil 1-iyundan bir qator o‘zgarish va yangiliklar kuchga kirdi. Quyida ushbu sanadan kuchga kirgan asosiy o‘zgarishlar taqdim etildi.
Yo‘l chiziqlarini bosganlik uchun radar orqali jarima qo‘llanilmaydi
Yo‘lning qatnov qismidagi chiziqlar bilan belgilab qo‘yilgan talablarga rioya etmaslik holatlarini har qanday maxsus avtomatlashtirilgan foto va video qayd etish dasturiy-texnik vositalari orqali qayd etishga yo‘l qo‘yilmaydi.
Yo‘llarni ta’mirlashga soat 07:00 dan 21:00 gacha yo‘l qo‘yilmaydi
Shaharlar avtomobil yo‘llarida ta’mirlash yoki yo‘l chiziqlarini chizish bilan bog‘liq ishlarni soat 07:00 dan 21:00 ga qadar amalga oshirishga (dam olish kunlari, shuningdek, kechiktirib bo‘lmaydigan alohida holatlar bundan mustasno) yo‘l qo‘yilmaydi.
Haydovchilar uchun jarima ballari kuchga kirdi
Yo‘l harakati qoidabuzarliklari uchun jarima ballari “E-jarimaball” moduli orqali inson omilisiz avtomatlashtirilgan tartibda hisoblab boriladi. 12 oy mobaynida yo‘l harakati qoidalarini buzmagan haydovchilarga rag‘batlantirish tariqasida, keyingi davrda yo‘l harakati qoidalarini birinchi marta buzgani uchun birinchi jarima bali hisoblanmaydi. Jarima ballari 12 balldan oshgan haydovchilar transport vositasini boshqarish huquqidan mahrum qilinadi.
Quyida ayrim qoidabuzarliklar va ularga belgilangan jarima ballari miqdori keltirildi
Tezlikni oshirganlik uchun quyidagicha ball hisoblandi:
- 20 km/soatgacha — 0,5 ball;
- 20 dan 40 km/soatgacha — 1 ball;
- 40 dan 60 km/soatgacha — 1,5 ball;
- 60 km/soatdan yuqori — 2 ball.
O‘zbekiston va Xitoy o‘rtasida o‘zaro vizasiz rejim joriy qilindi
Ikki davlat fuqarolari uchun 30 kunga o‘zaro vizadan ozod qilish to‘g‘risidagi hukumatlararo bitim kuchga kirdi.
Yana uch davlat fuqarolariga 30 kunlik vizasiz rejim kuchga kirdi
Bahrayn, Kuvayt va Ummon fuqarolari uchun O‘zbekiston hududiga kirgan kundan e’tiboran 30 kunlik muddatga vizasiz rejim belgilandi.
Avtotransport vositalarining elektron navbat tizimi joriy etildi
Davlat chegarasi orqali avtomobil o‘tkazish punktlarida avtotransport vositalarining elektron navbat tizimi joriy etildi. Bunda elektron navbat tizimi O‘zbekiston hududidan chiqish yo‘nalishida harakatlanayotgan yuk avtotransport vositalari uchun qo‘llanadi. Shuningdek, davlat chegarasi orqali avtomobil o‘tkazish punktlari yaqinida kutish zonalari tashkil etiladi.
Talaba qizlarga maxsus yangi stipendiya tayinlanadi
“Qizil” toifaga kiruvchi kam ta’minlangan oilalarning “a’lo” baholarda o‘qiyotgan talaba qizlariga bazaviy stipendiyaning 2 baravari (750 ming so‘m) miqdorida maxsus stipendiya to‘lanadi.
Xalqaro fan olimpiadalari g‘oliblariga to‘lanadigan pul mukofoti oshirildi
Xalqaro fan olimpiadalari g‘olib va sovrindorlariga to‘lanadigan bir martalik pul mukofotining miqdorlari 5 baravarga (937 mln 500 000 so‘mgacha) oshirildi.
Ko‘p kvartirali uylarda hisoblagichlar majburiy o‘rnatiladi
Ko‘p kvartirali uy-joylar va binolarning ichki issiqlik va issiq suv tarqatuvchi tizimlarining qurilishi, inshootlar va tarmoqlarda hisoblagichlarning to‘liq o‘rnatilishi majburiy hisoblanadi.
Ilmiy darajaga ega ayrim mutaxassislarga uy sotib olish uchun ssuda ajratiladi
Nufuzli xalqaro reyting tashkilotlarining yuqori 100 talik ro‘yxatiga kiritilgan xorijiy oliy ta’lim tashkilotlarida ilmiy daraja (PhD va unga tenglashtirilgan boshqa ilmiy daraja) olgan 35 yoshgacha bo‘lgan mutaxassislarga uy-joy sotib olish uchun 10 yil muddatga BHMning 2 150 baravarigacha miqdorda foizsiz ssuda ajratiladi.
Faol hayotga qadam dasturi joriy etildi
O‘zgalar parvarishiga muhtoj voyaga yetgan shaxslarni qo‘llab-quvvatlashga qaratilgan “Faol hayotga qadam” dasturi joriy etiladi. Dastur doirasida quyidagi 5 turdagi yangi ijtimoiy xizmatlar ko‘rsatilishi yo‘lga qo‘yiladi:
- uy sharoitida ijtimoiy-maishiy yordam ko‘rsatish xizmati;
- uy sharoitida qarab turish xizmati;
- tibbiy-ijtimoiy reabilitatsiya xizmati;
- kunduzgi qatnov asosida qarab turish xizmati;
- shaxsiy yordamchi xizmati.
Dastur doirasidagi ijtimoiy xizmatlardan foydalanish xarajatlarining bir qismi vaucher asosida qoplab beriladi.
Kambag‘al oilalarga davlat xizmatlaridan foydalanish uchun chegirmalar beriladi
Davlat xizmatlaridan foydalanish uchun bojlar, yig‘imlar va boshqa to‘lovlarni to‘lashda “sariq” toifaga kiritilgan oilalarga 50 foiz, “qizil” toifaga kiritilgan oilalarga esa 75 foiz miqdorida chegirmalar qo‘llaniladi.
Nogironligi bo‘lgan shaxslarni ishga olgan tadbirkorlarga subsidiya beriladi
I va II guruh nogironligi bo‘lgan shaxslarni ishga qabul qilgan tadbirkorlarga 50 mln so‘mgacha subsidiya ajratiladi. Bunda subsidiya surdotarjimon, psixolog va hamrohlik xizmatini tashkil qilish xarajatlarini qoplash uchun ajratiladi. Jismoniy shaxslarga hamrohlik xizmatini o‘zini o‘zi band qilgan shaxs sifatida ko‘rsatishga ruxsat beriladi.
Harbiylarga uy-joy sotib olish uchun ipoteka kreditiga beriladigan dastlabki badal oshdi
Tasdiqlanadigan ipoteka kreditlarini ajratish ko‘rsatkichlari asosida uy-joy bilan ta’minlanadigan, 10 yildan ortiq harbiy xizmatni o‘tagan harbiy xizmatchilarga turar joy sotib olish (qurish) uchun ipoteka krediti olinishida ajratiladigan dastlabki badal miqdori uy-joyning hisoblangan qiymati 35 foizi miqdorida belgilandi.
Izoh (0)