Toshkent viloyati Bo‘stonliq tumanidagi “Kimyogar” oromgohida 27–31-may kunlari “Kimyo sanoati yosh mutaxassislari” ilmiy-intellektual forumi bo‘lib o‘tdi. Bu haqda “O‘zkimyosanoat” AJ matbuot xizmati xabar berdi.
Ushbu forumda “O‘zkimyosanoat” AJ tizim korxonalarida faoliyat yuritayotgan yosh mutaxassislar, D.I.Mendeleev nomidagi Rossiya kimyo texnologiyalari universiteti Toshkent shahri filiali, Toshkent kimyo- texnologiya instituti hamda Yangi O‘zbekiston universiteti talabalari — jami 200 nafarga yaqin yosh mutaxassis ishtirok etdi.
Forum dasturi yoshlar uchun har tomonlama foydali va qiziqarli tadbirlarga boy bo‘ldi. Dastlabki kuni yoshlar D.I.Mendeleev nomidagi Rossiya kimyo texnologiyasi universitetida bo‘lib, unda sohaning bo‘lajak mutaxassislari uchun yaratilgan shart-sharoitlar bilan yaqindan tanishdi.
Soʼngra ishtirokchilar Chirchiq kimyo-industrial texnoparkiga tashrif buyurdi. Forum qatnashchilari texnoparkdagi ishlab chiqarish jarayonlariga bevosita guvoh boʼldi.
Milliy forumning tantanali yopilish marosimida “Zakovat” intellektual o‘yini, shaxmat musobaqasi, “Eng yaxshi innovatsion g‘oya” tanlovida g‘olib bo‘lgan ishtirokchilar munosib taqdirlandi. Ularga pul mukofotlari, diplom-sertifikatlar, qimmatbaho esdalik sovg‘alari topshirildi.
Izoh (0)