O‘zbekiston va Eron o‘rtasida har tomonlama hamkorlikni mustahkamlash bo‘yicha 2025—2027-yillarga mo‘ljallangan “yo‘l xaritasi” imzolandi. Bu haqda O‘zbekiston hukumati matbuot xizmati xabar berdi.
Ma’lum qilinishicha, bosh vazir Abdulla Aripov boshchiligidagi hukumati delegatsiyasi rasmiy tashrif bilan Eronda bo‘lib turibdi. 11-may kuni Tehrondagi O‘zbekiston bosh vaziri va Eron birinchi vitse-prezidenti Muhammad Rizo Oref boshchiligidagi hukumatlar delegatsiyalarining uchrashuvi bo‘lib o‘tdi.
Tomonlar ushbu uchrashuv hamkorlikning yangi yo‘nalishlarini belgilab olish uchun qulay imkoniyat ekanini qayd etib, ikki tomonlama tovar ayirboshlash hajmini prezidentlar belgilab bergan 2 milliard dollarga chiqarish imkoniyatlarini atroflicha muhokama qildi.
Xususan, transport-logistika sohasidagi hamkorlikni yanada mustahkamlash muhim ahamiyatga ega. Buning uchun mazkur yo‘nalishda ko‘p yillardan buyon o‘z yechimini kutayotgan muayyan masalalarni zudlik bilan hal etish yuzasidan sa’y-harakatlarni birlashtirib, aniq amaliy choralarni ko‘rish lozimligi qayd etildi.
Shuningdek, tomonlar sanoat kooperatsiyasini rivojlantirish, mamlakatlar hududlari aro aloqalarni faollashtirish, ilm-fan, ta’lim, texnologiya va innovatsiyalar sohalarida hamkorlikni kengaytirish, shu bilan birga, turizm, madaniy-gumanitar yo‘nalishlardagi hamkorlikni yangi bosqichga olib chiqish muhim ekanini bildirdi.
Oliy darajada erishilgan kelishuvlar ijrosi o‘z vaqtida ta’minlanishida tegishli vazirlik va idoralar yanada faol ishlashlari lozimligi aytildi.
Uchrashuv so‘ngida O‘zbekiston va Eron o‘rtasida har tomonlama hamkorlikni mustahkamlash bo‘yicha 2025—2027-yillarga mo‘ljallangan “yo‘l xaritasi”, Imtiyozli savdo bitimining tovarlar ro‘yxatini tasdiqlash bayonnomasi, O‘simliklar himoyasi va karantini sohasida hamkorlik to‘g‘risidagi anglashuv memorandumi, Halol standart sohasida hamkorlik to‘g‘risidagi anglashuv memorandumi imzolandi.
Shu kuni Tehronda O‘zbekiston—Eron biznes forumi o‘tkazildi. Unda O‘zbekistondan 100 nafardan ortiq tadbirkorlar, vazirlik va idoralar vakillari o‘zlarining turli yo‘nalishdagi taklif va tashabbuslari bilan qatnashib, “B2B” shaklda muzokaralar olib bordi.
O‘zbekiston va Eron munosabatlari
Ikki davlat o‘zaro savdo va yuk tashish ko‘rsatkichlari, qo‘shma korxonalar soni oshmoqda, poytaxtlar o‘rtasida muntazam to‘g‘ridan to‘g‘ri aviaqatnovlar amalga oshirilmoqda, ishbilarmonlik va madaniy-gumanitar almashinuv kengaymoqda. O‘zaro savdoda barqarorlik kuzatilmoqda. Xususan, tovar ayirboshlash hajmi 500 million dollarga yetdi, qo‘shma korxonalar soni 210 dan oshdi. 2024-yil oktyabrida Eron va O‘zbekiston o‘zaro tovar ayirboshlash hajmini 10 barobarga oshirish maqsadida imtiyozli savdo bilan shug‘ullanish bo‘yicha dastlabki kelishuvlarga erishdi.
2025-yil 1-aprel kuni Shavkat Mirziyoyev va Eron prezidenti Mas’ud Pezeshkiyon telefon orqali muloqot qilib, O‘zbekiston—Eron munosabatlarini yanada rivojlantirishning dolzarb masalalarini atroflicha ko‘rib chiqqandi. Unda kimyo va neft-kimyo tarmoqlari, to‘qimachilik va oziq-ovqat sanoati, qishloq xo‘jaligi, qurilish materiallari tarmog‘i va boshqa yo‘nalishlardagi kooperatsiya loyihalarini qo‘llab-quvvatlash va jadal amalga oshirishga alohida e’tibor qaratildi.
Ikki davlat rahbalari 2024-yilning oktyabrida Ashxoboddagi xalqaro forum doirasida uchrashuv o‘tkazganida ham O‘zbekiston bilan Eron o‘rtasidagi ko‘p qirrali munosabatlarni rivojlantirishning dolzarb masalalari muhokama qilingandi.
Izoh (0)