Shavkat Mirziyoyev va Eron prezidenti Mas’ud Pezeshkiyon 1-aprel kuni telefon orqali muloqot qildi.
Prezident matbuot xizmatining xabar qilishicha, muloqotda bir-birlarini va mamlakatlarning do‘st xalqlarini Navro‘z va Ramazon hayiti bilan tabriklab, tinchlik-osoyishtalik, farovonlik va ravnaq tiladi.
Qabul qilingan “yo‘l xaritasi” asosida ko‘p qirrali O‘zbekiston—Eron munosabatlarini yanada rivojlantirishning dolzarb masalalari atroflicha ko‘rib chiqildi. Turli darajalarda faol muloqotlar va tashriflar davom etayotgani mamnuniyat bilan qayd etildi.
O‘zaro savdo va yuk tashish ko‘rsatkichlari, qo‘shma korxonalar soni oshmoqda, poytaxtlar o‘rtasida muntazam to‘g‘ridan to‘g‘ri aviaqatnovlar amalga oshirilmoqda, ishbilarmonlik va madaniy-gumanitar almashinuv kengaymoqda. Kimyo va neft-kimyo tarmoqlari, to‘qimachilik va oziq-ovqat sanoati, qishloq xo‘jaligi, qurilish materiallari tarmog‘i va boshqa yo‘nalishlardagi kooperatsiya loyihalarini qo‘llab-quvvatlash va jadal amalga oshirishga alohida e’tibor qaratildi.
Tehron shahrida o‘tkazilishi rejalashtirilgan hukumatlararo komissiya yig‘ilishi, biznes forumi va sanoat ko‘rgazmasini samarali tashkil etish muhimligi ta’kidlandi. O‘zbekiston va Eron yetakchilari xalqaro va mintaqaviy ahamiyatga molik masalalar yuzasidan ham fikr almashdi.
Ikki davlat rahbalari 2024-yilning oktyabrida Ashxobod shahridagi xalqaro forum doirasida uchrashuv o‘tkazgandi. Unda ham O‘zbekiston bilan Eron o‘rtasidagi ko‘p qirrali munosabatlarni rivojlantirishning dolzarb masalalari muhokama qilingandi.
Izoh (0)