O‘zbekistondagi 50 nafar tajribali hamshira Germaniyaga ishga taklif qilinmoqda. Bu haqda Migratsiya agentligi matbuot xizmati xabar berdi.
Ma’lum qilinishicha, bu imkoniyat agentlik bilan hamkorlikda Germaniyaning RecruitMed GmbH & Co. KG kompaniyasi tomonidan taqdim etilmoqda.
Oylik maosh 2800 yevrodan boshlanadi. Bunda uy ijarasi va ovqatlanish xarajatlari ishlovchining o‘z hisobidan qoplanadi. Malaka tan olingandan so‘ng 3300 yevro oylik beriladi.
Kompaniya tomonidan 50 ta bo‘sh ish o‘rinlari taklif etilayotgan bo‘lib, nomzodlar 18–40 yosh atrofida bo‘lishi, tibbiyot kolleji (3 yillik) yoki oliy ta’lim (bakalavr) diplomiga, hamshiralik sohasida kamida 1 yillik ish tajribasiga ega bo‘lishi lozim. Shuningdek, sudlanmagan va sog‘lom bo‘lishi ham talab etiladi.
Nomzodlarga quyidagi imtiyozlar taqdim etiladi:
- 12 oylik nemis tili kurslari (Termiz va Nukusda);
- kurs materiallari, imtihonlar, til sertifikati (B2);
- Germaniyada malaka tasdig‘i;
- vizaga ariza topshirish va ishga joylashish;
- aviachipta ва transfer;
- yashash joyini topishda yordam;
- 13 oylik maosh tizimi, sug‘urta, mehnat ta’tili;
- doimiy qo‘llab-quvvatlash.
Ish bo‘yicha qo‘shimcha ma’lumotlarni quyidagi telefon raqamlariga qo‘ng‘iroq qilib olish mumkin: (55) 102-53-32 (Qoraqalpog‘iston Respublikasi), (76) 222-45-22 (Surxondaryo viloyati).
RecruitMed GmbH & Co. KG — Germaniyaning Kyoln shahrida joylashgan, sog‘liqni saqlash sohasida ixtisoslashgan xalqaro kadrlar agentligi hisoblanadi. Ushbu kompaniya ilgari Medical Recruiters nomi bilan tanilgan bo‘lib, hozirda RecruitMed nomi ostida faoliyat yuritmoqda. RecruitMed Germaniyadagi tibbiyot muassasalari uchun xorijiy malakali tibbiy xodimlarni jalb qilish va joylashtirish bilan shug‘ullanadi.
Izoh (0)