Австралиянинг жануби-шарқида ёғган ёмғир чоршанба куни қисқа муддатли тошқинларни келтириб чиқарди ва кўплаб шаҳарларни ташқи дунёдан узиб қўйди. Бу ҳақда Reuters хабар қилмоқда.
Натижада аҳолининг баъзилари уйларининг томига чиқишга мажбур бўлган. Дарё сатҳи кўтарилгани сабаб Австралия расмийлари тезкор эвакуация қарорини қабул қилган.
Таъкидланишича, Янги Жанубий Уэлс (Австралиянинг энг зич аҳолига эга штати)даги Ҳантер ва Мид Норт Кост энг кўп зарар кўрган минтақа бўлди. Айрим ҳудудларда сўнгги 24 соат ичида 4 ойлик ёмғир миқдорига тенг ёғингарчилик кузатилган.
“Ёмғир жуда кучли ёғмоқда ва ҳали тўхтагани йўқ. Ерлар намликка тўйингани сабаб дарёлар тошиб кетмоқда”, деди Янги Жанубий Уэлс фавқулодда вазиятлар хизмати вазири Жиход Диб журналистларга берган интервьюсида.
Австралия Метеорология бюросининг сўнгги маълумотларига кўра, айрим ҳудудларга кейинги 24 соат ичида 300 мм (12 дюйм) гача ёмғир ёғиши мумкин, бу май ойи учун ўртача миқдордан уч баробар кўп.
Ижтимоий тармоқларда тарқалган суратларда баъзи фуқаролар уйларининг ичида тиззасигача сув ичида қутқарувчиларни кутиб ўтиргани кўриш мумкин.
Сиднейдан 300 км (186 мил) шимолда жойлашган Тари ва Гленторн шаҳарларида фуқаролар айвонлар ва томларда қамалиб қолган. Фавқулодда хизматлар тун бўлишига қарамай, қайиқ ва ҳаво орқали ҳудудга етиб боришга ҳаракат қилган.
Янги Жанубий Уэлс фавқулодда вазиятлар хизмати раҳбари Майк Васингнинг таъкидлашича, қутқарувчилар асосий эътиборни заиф ва уйини тарк эта олмаган шахсларни қутқаришга қаратишмоқда.
“Ҳозирги диққат — айнан томларда ёки уйининг иккинчи қаватида қолиб кетган шахсларга қаратилган”, дейди у.
Изоҳ (0)