Qashqadaryo viloyat sudi raisi Abduqayum Mahkamovga xizmat ko‘rsatuvchi Skoda Kodiaq Ambition rusumli davlat raqami 70 027 SAA bo‘lgan avtomobilida sodir etilgan qoidabuzarlik jarimasi 3 yildan so‘ng to‘landi. Bu haqda Qashqadaryo viloyat sudining Jinoyat ishlari bo‘yicha sudlov hayʼati kassatsiya instansiyasi qarorida so‘z borgan.
Sudya Qambarova raisligida 2025-yilning 30-aprel kuni bo‘lib o‘tgan sudda huquqbuzar — katta ehtimol bilan xizmat avtomobili haydovchisi o‘ziga nisbatan chiqarilgan sud qarori ustidan yozgan shikoyati va maʼmuriy huquqbuzarlik to‘g‘risidagi ish ko‘rib chiqilgan.
Maʼlum bo‘lishicha, haydovchi 2021-yil 27-noyabr kuni soat 14:43 larda A-378 avtomobil yo‘lining Chiroqchi tumani hududidan o‘tuvchi qismida boshqaruvidagi Qashqadaryo viloyat sudi balansidagi Skoda Kodiaq Ambition rusumli davlat raqami 70 027 SAA bo‘lgan avtomobilni 107 km/soat tezlikda harakatlantirib kelib, belgilangan 70 km/soat tezlikdan oshirib yuborgan. Hamda Maʼmuriy javobgarlik to‘g‘risidagi kodeksining 128-3-moddasi 2-qismida nazarda tutilgan huquqbuzarlikni qasddan sodir qilgan.
Bu qoidabuzarlik 2022-yil 13-may kuni Jinoyat ishlari bo‘yicha Qarshi shahar sudida ko‘rib chiqilib, sud raisining xizmat avtomobiliga tayinlangan bazaviy hisoblash miqdorining o‘n baravari miqdoridagi 1 mln 350 ming so‘mlik jarima to‘g‘risidagi qaror bekor qilingan.
Oradan uch yil o‘tib, 2025-yilning mart oyida haydovchi yoki sud raisi Qashqadaryo viloyati IIB YHXB inspektori F.Nazarov imzosi bilan 2021-yil 4-dekabr kuni imzolangan RA-21528699677-raqamli qaror jarimasini to‘laganini, Qarshi shahar sudining 2022-yil 13-may kunidagi qaroriga eʼtirozi borligini maʼlum qilgan.
Huquqbuzar shikoyatida, jarimani o‘z vaqtida to‘lagani sababli sud qarorini bekor qilishni so‘ragan, deyiladi sud hujjatida.
Qashqadaryo viloyat sudi jinoyat ishlari bo‘yicha sudlov hayʼati kassatsiya instansiyasi mazkur ishni qayta ko‘rib chiqib, birinchi instansiya sudi ishni ko‘rib chiqishda qonun talablariga yetarlicha to‘liq rioya qilmay, huquqbuzarni jazodan ozod qilib, barvaqt xulosaga kelgan degan to‘xtamga keldi.
Huquqbuzarning qasddan maʼmuriy huquqbuzarlik sodir qilganlikdagi aybi, unga jarima jazosi qo‘llash haqidagi qaror, ushbu qarorga ilova qilingan video lavha kabi ish yuzasidan to‘plangan dalillarga asosan o‘z isbotini topgan. Shuningdek, u kassatsiya shikoyatida qilmishiga iqrorlik bildirib, jarima summasini to‘laganini ko‘rsatgan hamda 1 mln 350 ming so‘m jarima summasi Sudlar faoliyatini taʼminlash departamentining Qashqadaryo viloyat bo‘limi hisob raqamiga to‘langani haqidagi to‘lov kvitansiyasida tasdiqlangan. Bunday holda sudning qarorini asosli deb bo‘lmaydi. Shu maʼnoda, kassatsiya instansiyasi sudi sud qarorini bekor qilib, huquqbuzar tomonidan jarima summasi to‘liq to‘langanini qayd qilishni lozim topdi, deyiladi sud qarorida.
Telegram’dagi Generalissimus kanalining yozishicha, sud xodimlari o‘zlari shikoyat berib, muqaddam kamaytirilgan jarimalarni o‘z holiga keltirib, mablag‘ni to‘lamoqda. Bunga Oliy sud raisi birinchi o‘rinbosari Ikrom Muslimovning topshirig‘i sabab bo‘lgan bo‘lishi mumkin.
Oliy sud axborot xizmati bunga Muslimovning topshirig‘i sabab bo‘lganini rad qilgan.
Internet tarmog‘iga joylangan sud qarorlaridan ko‘rinishicha, 2025-yil 23-apreldan 8-mayga qadar Samarqand, Toshkent, Xorazm, Qashqadaryo, Surxondaryo viloyatlari va Toshkent shahar sudi jinoyat ishlari bo‘yicha sudlov hayʼatlarida 100 ga yaqin tezlikni oshirish bilan bog‘liq maʼmuriy huquqbuzarlik to‘g‘risidagi ishlar kassatsiya tartibida ko‘rib chiqilgan. Ularning aksariyati huquqbuzar shaxslarning birinchi instansiya sudi qarorini bekor qilish va YHXX organlari qo‘llagan jarimani o‘z holiga qaytarish to‘g‘risida bergan kassatsiya shikoyatlari asosida ko‘rilgan.
Izoh (0)