Gruziyaning hukmron “Gruziya orzusi — Demokratik Gruziya” partiyasi parlamentga grantlar to‘g‘risidagi qonunga o‘zgartirish kiritishni taklif qildi. Unga ko‘ra, Gruziya fuqarosi yoki mamlakatda faoliyat yuritayotgan tashkilot hukumatning oldindan ruxsatisiz bunday mablag‘larni ololmaydi. Bu haqda “Gruziya orzusi” fraksiyasi raisining birinchi o‘rinbosari Irakliy Kirtsxaliya ma’lum qildi.
Uning ta’kidlashicha, bunday cheklovlar tashqi kuchlarning Gruziyada “Molotov kokteylini otishni ulug‘lash” kampaniyalari, zo‘ravonlik harakatlari yoki boshqa buzg‘unchi faoliyatlarni moliyalashtirishiga yo‘l qo‘ymaslik uchun zarur.
Yangi qoida chet elda ta’lim olish yoki ilmiy faoliyat uchun beriladigan grantlarga, shuningdek, sport uyushmalariga taalluqli bo‘lmaydi. Qonunni tezlashtirilgan tartibda qabul qilish rejalashtirilmoqda.
Siyosatchining qo‘shimcha qilishicha, grantlar ajratilishini Gruziya hukumati huzuridagi Korrupsiyaga qarshi kurash byurosi nazorat qiladi. Agar oluvchi mahalliy hokimiyatning ruxsatisiz chet el mablag‘larini olsa, u grant miqdorining ikki baravari miqdorida jarimaga tortiladi.
Gruziya parlamenti 1-aprel kuni AQSHda amalda bo‘lgan FARA qonunining aynan nusxasi bo‘lgan chet el agentlari to‘g‘risidagi qonunni qabul qildi. 2024-yilda qabul qilingan “Chet el ta’sirining shaffofligi to‘g‘risida”gi qonundan farqli o‘laroq, yangi qonun jinoiy javobgarlikni nazarda tutadi va jismoniy shaxslarga ham tatbiq etiladi.
Izoh (0)